Ռուսաստանը պարտավոր է Հայաստանին օգնել, բայց ոչ Լեռնային Ղարաբաղին: Այս մասին փետրվարի 28-ին հայտարարեց ռուսաստանցի քաղաքագետ Ալեքսանդր Սկակովը՝ ելույթ ունենալով «Ղարաբաղյան հակամարտության գոտում իրավիճակի լարվածության ներքին եւ արտաքին գործոնները» թեմայով քննարկման ընթացքում:
Նրա խոսքով՝ Մոսկվայի ու Բաքվի եւ Մոսկվայի ու Երեւանի միջեւ հարաբերությունները միանման չեն, տարբեր են: «Եվ, իհարկե, Մոսկվայի համար Երեւանը գործընկեր չէ, այլ դաշնակից, Ադրբեջանը Ռուսաստանի գործընկերն է: Մենք պարտավոր չենք ռազմական առումով մեր գործընկերոջն օգնելու, բայց մենք պարտավոր ենք մեր դաշնակցին պաշտպանելու: Մենք պարտավոր ենք Հայաստանին օգնելու, բայց ոչ թե Լեռնային Ղարաբաղին: Մեզ շատ են հանդիմանում, որ Ռուսաստանը Լեռնային Ղարաբաղը չի ճանաչել, բայց նրան չի ճանաչել նաեւ Երեւանը»,- նշեց Սկակովը:
Քաղաքագետը միեւնույն ժամանակ հիշեցրեց, որ Ռուսաստանի ԱԳ նախարար Սերգեյ Լավրովը մամուլի ասուլիսի ժամանակ հայտարարել է, որ ղարաբաղյան խնդիրը Ադրբեջանի ներքին խնդիրը չէ: «Այսինքն՝ բավական կարեւոր է, որ նման բաներ են ասվում այդպիսի բարձր մակարդակով»,- ընդգծեց Ալեքսանդր Սկակովը:
Հիշեցնենք, որ փետրվարի 25-ին՝ ժամը 03:00-ի եւ 04:00-ի սահմաններում, շփման գծի միանգամից երկու` հարավարեւելյան (Մարտունի) եւ արեւելյան (Ակնա) ուղղություններով հակառակորդը, օգտագործելով ականազերծման համապատասխան տեխնիկա եւ հատուկ միջոցներ, ձեռնարկել է հարձակման փորձ։
«ՊԲ առաջապահ ստորաբաժանումները, նաեւ շնորհիվ տեսադիտարկման սարքավորումների, երկու ուղղություններում էլ ժամանակին հավաստանշել են ադրբեջանական ստորաբաժանումների առաջխաղացումը եւ կորուստներ պատճառելով հետ շպրտել ելման դիրքեր: Բանակի առաջապահ ուժերի պատասխան գործողությունների արդյունքում հակառակորդը տվել է զոհեր եւ վիրավորներ: