Բրազիլիայի Ռիո դե Ժանեյրո քաղաքում ավանդական կառնավալի ժամանակ փլուզվել է պարի դպրոցի հարթակի մի մասը, 17 մարդ վիրավորվել է: Այս մասին հայտնում է Associated Press-ը:
Միջադեպը տեղի է ունեցել երեքշաբթի գիշերը. փլուզվել է սամբայի Unidos da Tijuca դպրոցի հարթակը: Նահանգի առողջապահության նախարարությունից հայտնել են, որ 6 տուժողներ հիվանդանոց են տեղափոխվել, նրանցից երկուսի վիճակը ծանր է: Կազմակերպիչները շոուն գրեթե կես ժամով դադարեցրել են, որ տուժողներին բժշկական օգնություն ցույց տան, որից հետո այն վերսկսվել է:
Ոստիկանությունը միջադեպի հետաքննություն է սկսել: Սամբայի Unidos da Tijuca դպրոցի տնօրեն Աիլտոն Ֆրեյտասը նշել է, որ կառնավալից առաջ հարթակները բազմիցս թեստի են ենթարկում:
Սա Ռիո դե Ժանյրոյի կառնավալում տեղի ունեցած երկրորդ միջադեպն է: Առաջին միջադեպը տեղի էր ունեցել կիրակի, այդ ժամանակ 20 մարդ էր տուժել:
