Միջազգային 24 կազմակերպություններ խստորեն դատապարտել են Ադրբեջանի իշխանություններին խոսքի եւ արտահայտվելու ազատության ճնշման վերջին քայլերի պատճառով:
contact.az-ը հաղորդել է, որ մարտի 3-ի նրանց համատեղ հայտարարության մեջ նշված է, որ Մեհման Հուսեյնովի դատավճիռը վկայում է խոսքի ազատությունը հարգելու իշխանությունների ցանկության բացակայության եւ քննադատական ձայների վրա բռնաճնշումները շարունակելու մտադրության մասին: «Մեհման Հուսեյնովի դատավճիռը եւ բանտարկությունը եւս մեկ օրինակ է, որ Ադրբեջանում թիրախ են համարվում Իլհամ Ալիեւի ռեժիմը քննադատողները: Սա նաեւ ցույց է տալիս, որ անցյալ տարի մի շարք քաղբանտարկյալների ազատելուց ի վեր ոչինչ չի փոխվել: Քաղաքական դրդապատճառներով կալանավորումները, նախկինի նման, սովորական պրակտիկա են, եւ Մեհման Հուսեյնովն այսօր բանտարկված 13 լրագրողներից, բլոգերներից ու լրատվամիջոցների աշխատակիցներից մեկն է: Նրանք բոլորը պետք է անհապաղ եւ անվերապահորեն ազատ արձակվեն՝ Ադրբեջանի ստանձնած միջազգային պարտավորություններին համապատասխան»,- ասել է «Թղթակիցներ առանց սահմանների» կազմակերպության բրիտանական բյուրոյի ղեկավար Ռեբեկա Վինսենթը:
«Մենք ցնցված եւ խորապես վշտացած ենք այս խայտառակ դատավճռի պատճառով, որը ոչ այլ ինչ է, քան արադարադատության ծաղր»,- ասել է Լրատվամիջոցների միջազգային աջակցության (IMS) կազմակերպությունից Գյուլնարա Ախունդովան:
Ուշագրավ է, որ Մեհման Հուսեյնովը քննադատել էր առաջին տիկին Մեհրիբան Ալիեւային 2017-ի փետրվարի 21-ին փոխնախագահի պաշտոնում նշանակելը:
«Մինչեւ երկրի փոխնախագահի պաշտոնում Մեհրիբան Ալիեւային նշանակելը կառավարությունը երկրում անցկացրել է ակտիվիստների, լրագրողների եւ բլոգերների կալանավորումների եւ հետապնդումների հերթական ալիքը՝ ավտորիտար իշխանության ամրապնդման եւ վիճելի նշանակման շուրջ ցանկացած այլախոհության կանխման նպատակով»,- նշել է FIDH-ից Սաշա Կուլաեւան: Մասնավորապես՝ իշխանությունները կեղծ մեղադրանքներով կալանավորել են ընդդիմության մի քանի ներկայացուցիչների, այդ թվում՝ «Ազգային ճակատ» կուսակցության 10 անդամների, REAL եւ D18 շարժումների մեկական անդամի:
Հավաստի տեղեկություններ կան կալանավորվածների նկատմամբ խոշտանգումների եւ դաժան ու մարդու արժանապատվությունը նվաստացնող այլ եղանակների կիրառման մասին:
«Մենք՝ ներքո ստորագրող կազմակերպությունները, Ադրբեջանի կառավարությանը կոչ ենք անում դադարեցնել կառավարությանը քննադատողների հետապնդումները եւ ձերբակալությունները: Խոշտանգումների մասին հաղորդումները պետք է հետաքննվեն, իսկ բոլոր քաղբանտարկյալները պետք է անհապաղ եւ անվերապահորեն ազատ արձակվեն: Իշխանություններին քննադատողների թունավորման եւ հետապնդումների արշավը պետք է անհապաղ դադարեցվի: Մենք նաեւ միջազգային հանրությանը կոչ ենք անում ճնշում գործադրել Ադրբեջանի իշխանությունների վրա՝ պահանջելով մարդու իրավունքների ոլորտում իր ստանձնած միջազգային պարտավորությունների կատարում»,- նշված է հայտարարության մեջ, որը ստորագրել են Article 19-ը, Լրագրողների պաշտպանության կոմիտեն (CPJ), «Թղթակիցներ առանց սահմանների» կազմակերպությունը, Human Rights House Foundation-ը, Pen միջազգային ակումբը, Ընդդեմ խոշտանգումների կիրառման կազմակերպությունը եւ եւս մոտ 2 տասնյակ այլ կազմակերպություններ: