Գեղարքունիքի մարզում 2017թ. նախատեսվում է 45 միլիոն դոլարի ներդրում: Այս մասին այսօր՝ մարտի 17-ին, Գավառ քաղաքում ընտրողների հետ հանդիպմանն ասաց ՀՀԿ-ի նախընտրական քարոզարշավն իրականացնող ՀՀ վարչապետ Կարեն Կարապետյանը: Վարչապետը հիշեցրեց, որ ընդհանուր առմամաբ իրենք նախատեսում են 3.2 միլիարդ դոլարի ներդրում, որից շուրջ 830 միլիոնն՝ այս տարի:
«Գեղարքունիքի մարզին հատկացվող 45 միլիոնով մենք փորձում ենք իրականացնել 31 ծրագիր, բացել շուրջ 1500 աշխատատեղ: Գեղարքունիքի մարզում աշխատելու ենք հետեւյալ ուղղությունների զարգացման ուղղությամբ՝ այլընտրանքային էներգետիկա, գյուղատնտեսություն, ենթակառուցվածքներ, ինչպես նաեւ էկոպարկ եւ տուրիզմ, մտադիր ենք նաեւ ստեղծել «Սեւան-ձուկ» ՓԲԸ եւ օրինականացնել ձկնորսությունը, որպեսզի մարդիկ, որոնք ձկնորսությամբ ընտանիք են պահում, կարողանան գործել օրինական դաշտում, իսկ մենք էլ ապահովենք նրանց անվտանգությունը», -ասաց Կարեն Կարապետյանը:
Հիշեցնենք, որ Հանրապետական կուսակցության քարոզարշավն իրականանցնում է Կարեն Կարապետյանը, թեեւ համամասնական ցուցակում չկա: Գավառում այսօր նրան ուղեկցում էին ՀՀ արդարադատության նախարար Արփինե Հովհաննիսյանը, ՀՀ մշակությի նախարար Արմեն Ամիրյանը եւ «Արաբկիր» բժշկական կենտրոնի տնօրեն Արա Բաբլոյանը:
