Մարտի 17-ին ՀՀ ԱԻ նախարար Դ. Տոնոյանն ընդունեց ՀՀ-ում ԱՄՆ արտակարգ եւ լիազոր դեսպան Ռիչարդ Միլսին, նույն դեսպանատան Պաշտպանության հարցերով կցորդ, գնդապետ Բրյուս Մրֆիին եւ պաշտպանության ոլորտում համագործակցության պատասխանատու, մայոր Դոն Հարփերին:
Շնորհավորելով նախարարին նշանակման կապակցությամբ՝ դեսպանն ասաց. «ԱՄՆ դեսպանատունը հպարտ է նախարարության հետ ունեցած իր տեւական սերտ համագործակցության համար, եւ մենք կշարունակենք հարկ եղած դեպքում պատրաստակամորեն աջակից լինել նախարարությանը: Այս տարի մենք տոնում ենք հայ-ամերիկյան հարաբերությունների 25-ամյակը, եւ նախարարության ու դեսպանության միջեւ նման արդյունավետ ու հաջող գործընկերությունների շնորհիվ է, որ մենք կարողացել ենք այսքան շատ ձեռքբերումներ ունենալ»:
Հանդիպման ընթացքում քննարկվեց հայ-ամերիկյան համագործակցության խորացումն արտակարգ իրավիճակների, բնակչության պատրաստվածության եւ դիմակայունության ոլորտներում, ինչպես նաեւ՝ համատեղ վարժանքների միջոցով տարածաշրջանային համագործակցության ակտիվացումը, մասնավորապես՝ ԱՄՆ-ի Կանզաս նահանգի հետ գործընկերության շրջանակներում:
Քննարկվեց նաեւ վերապատրաստման եւ ուսուցման միջոցով ամերիկյան փորձի ներդրման հնարավորությունը վտանգավոր նյութերի հետ աշխատանքում, հրդեհների դեմ պայքարի, փրկարարական աշխատանքների իրականացման եւ բուժպատրաստության բնագավառում: Յուրաքանչյուր դասընթաց ամփոփվելու է ավարտական վարժանքով:
