Ընտրակաշառքներ վերցնող մարդիկ պատրա՞ստ են իրենց ձայները վաճառել ում պատահի։ Եթե այդպես է՝ բոլոր հայերին, որոնք ընտրություններին մասնակցելու իրավունք ունեն, կարող է գնել որեւէ հարուստ թուրք,հնդիկ, չինացի՝ ընդամենը 20 մլն դոլարով։ Այս մասին Երեւանի Նոր Նորք թաղամասում ընտրողների հետ հանդիպման ժամանակ մարտի 20-ին հայտնել է Արթուր Բաղդասարյանը՝ «Հայկական վերածնունդ» կուսակցության առաջնորդը։
Նրա խոսքով, եթե պատգամավորի թեկնածուն շատ փող ունի ու պատրաստ է գնել ընտրողների ձայները, դա դեռ չի նշանակում, որ նրա օգտին արժե քվեարկել։ Եթե մարդիկ պատրաստ լինեն քվեարկել նրա օգտին, ով շատ փող ունի ու պատրաստ է վճարել նրանց, արդյո՞ք չկա վտանգ, որ նրանց ձայները կկարողանա գնել, օրինակ, որեւէ հարուստ թուրք, հնդիկ կամ չինացի։
«Մեր ընտրություններին մասնակցում է մոտ 1 մլն ընտրող, առավելագույնը՝ 1 մլն 100 հազար։ Որեւէ հարուստ թուրք, հնդիկ կամ չինացի կարող է ընդամենը 20 մլն դոլարով գնել Հայաստանի բոլոր ընտրողներին՝ յուրաքանչյուրին վճարելով 10 հազարական դրամ։ Մենք ի՞նչ է, արժանապատվություն չունե՞նք։ Պատիվ չունե՞նք։ Ի՞նչ է 20 մլն դոլարը միլիարդատերերի համար։ Նրանք կարող են ընդամենը 20 մլն դոլար տալ ու գնել բոլոր ընտրողներին՝ նրանց պատվով ու արժանապատվությունով հանդերձ»,- ասել է ԲԱղդասարյանը։
Իր ելույթի ժամանակ Արթուր Բաղդասարյանը կրկնել է իր կուսակցության նախընտրական ծրագրի հիմնական դրույթները, հատուկ ուշադրություն դարձնելով կրթության, բանակի, ցածր աշխատավարձերի ու կենսաթոշակների խնդիրներին։
