Հնարավոր է՝ Լեհաստանը հրաժարվի ստորագրել Հռոմում տեղի ունենալիք ԵՄ գագաթնաժողովի ամփոփիչ հռչակագիրը, եթե այն չներառի Լեհաստանի համար առաջնային դրւյթները: Այս մասին հայտարարել է Լեհաստանի վարչապետ Բեատա Շիդլոն:
Նա հիշեցրել է, որ խոսքը 4 դրույթի մասին է, որոնք պարունակվում են, այսպես կոչված, Վարշավայի հռչակագրում եւ ընդունվել են Վիշոգրադյան խմբի կողմից: Խոսքը Եվրամիության ամրապնդման, ՆԱՏՕ-ի շրջանակներում սերտ համագործակցության պաշտպանության, ազգային խորհրդարանների դերի ամրապնդման եւ ազատ շուկայի հիմքերի պահպանման մասին է, փոխանցում է Լեհաստանի ռադիոն:
Շիդլոյի խոսքով՝ Հռոմում ԵՄ գագաթնաժողովի նախաշեմին Լեհաստանի դրույթների հարցով ինքը խորհրդակցել է նախագահ Անջեյ Դուդայի ու «Իրավունք եւ արդարություն» կուսակցության առաջնորդ Յարոսլավ Կաչինսկու հետ:
Հիշեցնենք, որ Հռոմի պայմանագրի ստորագրման 60-ամյակին նվիրված ԵՄ-ի ոչ պաշտոնական գագաթնաժողովը տեղի կունենա մարտի 25-ին՝ Հռոմում:
