ՀՀԴ-ն երբեք այնպիսի խոստումներ չի տվել, որոնք հետագայում չի կատարել: Մարտի 23-ին՝ Արտաշատում ընտրողների հետ հանդիպման ժամանակ այս մասին հայտարարեց ԱԺ Դաշնակցություն խմբակցության քարտուղար Աղվան Վարդանյանը:
«Խղճի մտոք քվեարկեք, քանի որ այդ 5 եւ 10 հազար դրամը ձեզ երջանիկ չեն դարձնի: Մինչդեռ կաշառվելով՝ կկորցնենք ուժեղ, զարգացող երկիր ունենալու հնարավորությունը»,- հայտարարեց Աղվան Վարդանյանը: Նա խորհուրդ տվեց ճիշտ ընտրություն կատարելու համար համեմատել անցյալի ընտրություններում Դաշնակցության ծրագրերը, գործունեությունը եւ տված խոստումները մյուս քաղաքական ուժերի հետ:
Աղվան Վարդանյանը որոշեց կուսակցության 127-ամյա պատմության կարճ էքսկուրս կատարել՝ նշելով, որ իրենք դժվար պահերին ժողովրդի կողքին են եղել, եւ երբ իրենց կուսակցությունը նույնիսկ արգելված էր, իրենք նպաստել են Սփյուռքի ամրապնդմանը, տարբեր երկրներում հայի ինքնության պահպանմանը, իսկ հիմա ամբողջ աշխարհում առաջ են մղում Հայաստանի շահերը:
«Մենք նաեւ սխալներ ենք ունեցել, սակայն ՀՀԴ-ն երբեք այնպիսի խոստումներ չի տվել, որոնք չի կատարել: Մեր կուսակցությունը որակապես տարբերվում է մյուս բոլորից, որոնք մասնակցում են նախընտրական մրցավազքին»,- ընդգծեց Աղվան Վարդանյանը: Նա նշեց իրենց կուսակցության առավելություններից մեկը՝ իրենք մեկ մարդու կուսակցություն չեն, եւ ի տարբերություն մյուսների՝ ՀՀԴ-ից Արարատի մարզի բոլոր թեկնածուները կանգնած են այստեղ՝ իրար կողքի, նրանցից ոչ մեկը մյուսի հետ չի մրցակցում, քանի որ «մենք մեկ մեծ ընտանիք ենք»:
Վարդանյանը նաեւ նշեց, որ որոշ քաղաքական ուժեր ընտրությունների նախաշեմին իրենց անունը փոխում են, որ ժողովրդին խաբեն, որին ժամանակին ներկայումս չկատարած խոստումներ են տվել: Նա ընդգծեց քվեարկությանը մասնակցելու կարեւորությունը՝ հիշեցնելով, որ երկրում կառավարման համակարգ է փոխվում, եւ ժողովրդի ընտրած պատգամավորներն արդեն կորոշեն հետագա ճակատագիրը: Այս կապակցությամբ նա բերեց Գերմանիայի օրինակը՝ նշելով, որ ոչ ոք չգիտի, թե ով է նախագահը, բայց բոլորը գերազանց գիտեն՝ ով է տիկին Մերկելը: «Ձեզ անհանգստացնող բոլոր հարցերը կորոշի խորհրդարանը, եւ հատկապես այդ պատճառով ձեր ձայնը, ձեր ընտրությունը շատ կարեւոր է»,- հայտարարեց Աղվան Վարդանյանը: