Բրիտանական մամուլում նոր մանրամասներ են հայտնի դառնում մարտի 22-ին, Լոնդոնում կրկնակի ահաբեկչություն գործած անձի մասին։ Ոստիկանությունը հայտարարել է, որ ահաբեկչի անունը Հալիդ Մասուդ է։ Սակայն The Independent պարբերականը պարզել է, որ հանցագործի անունը եղել է Ադրիան Էլմս, նա ծնվել է Քենթ կոմսության Դարթֆորդ քաղաքում եւ 52 տարեկան էր։
Ըստ երեւույթին, Էլմսն իսլամ է ընդունել ու վերցրել Հալիդ Մասուդ անունը՝ բանտում պատիժ կրելիս։ Նախկին հարեւաններն ասում են, որ ցնցվել են՝ իմանալով, որ Մասուդն ահաբեկչություն է գործել։ Նրանց խոսքով՝ Մասուդը «լավ տղա էր», «նորմալ ընտանիք» ուներ։
Ըստ Սքոթլանդ Յարդի՝ Հալիդ Մասուդը հարուստ քրեական անցյալ է ունեցել։ Նա մի քանի դատվածություն է ունեցել՝ բռնի հարձակումների, ծանր մարմնական վնասվածքներ հասցնելու, ապօրինի զենք պահելու ու հասարակական կարգի խախտման պատճառով։
