Արարատի մարզի Վեդի քաղաքում այսօր՝ մարտի 24-ին, մի քաղաքացի «Ծառուկյան» դաշինքի առաջնորդ Գագիկ Ծառուկյանից հետաքրքրվեց՝ ինչ է արել Հովիկ Աբրահամյանը վարչապետ աշխատած տարիներին իր հարազատ մարզի համար:
«Հովիկ Աբրահամյանն էն ժամանակ մարզպետ էր, հետո դարձավ վարչապետ, իրա ռայոնի համար ի՞նչ արեց, ձեռը բռնին ասին՝ մի արա՞»,- Գագիկ Ծառուկյանին դիմեց Նորիկ անունով տղամարդը:
Հարցին Ծառուկյանը չպատասխանեց, միայն խնդրեց իրեն ասել, թե «ով է նրան ուղարկել»:
«Քո դասատուն ո՞վ ա, մենակ ճիշտն ասա, տղուդ անունով երդվի, քեզ ո՞վ ա ուղարկել, Նորիկ: Համարդ գրի, 20 րոպեից ես քեզ կզանգեմ»,- ասաց Ծառուկյանը:
Ծառուկյանին ուղեկցողները հենց տեսախցիկների առջեւ վերցրին քաղաքացու հեռախոսահամարը , իսկ Ծառուկյանն էլ խոստացավ ավելի ուշ անպայման զանգահարել նրան:
Հիշեցնենք, որ Հովիկ Աբրահամյանը Գագիկ Ծառուկյանի խնամին է. նրա որդին՝ Արտաշատի քաղաքապետ Արգամ Աբրահամյանը, առաջադրվել է «Ծառուկյան» դաշինքի տարածքային ցուցակով: Այսօր Արգամ Աբրահամյանն ուղեկցում էր Գագիկ Ծառուկյանին, խոսակցությանը նա այդպես էլ չխառնվեց: