Քաղաքական հանարձակություն է անհրաժեշտ՝ խաղաղության մասին պայմանագիրը ստորագրելու համար, որը Հայաստանի զարգացման համար լայն հնարավորություններ կտա։ Այս մասին NEWS.am-ի թղթակցի հետ զրույցում հայտարարել է «Կոնգրես-ՀԺԿ» դաշինքից պատգամավորի թեկնածու, Հայ ազգային կոնգրեսի ղեկավարի տեղակալ Արամ Մանուկյանը։ Պատասխանելով այն հարցին, թե արդյոք հասարակությունն ընդունում է «Կոնգրես-ՀԺԿ» դաշինքի դրույթները՝ արցախյան հարցում զիջումների եւ խաղաղություն հաստատելու վերաբերյալ՝ հաշվի առնելով անցյալ տարվա ապրիլյան իրադարձություններն ու դրանց հետեւանքով երկրում հայրենասիրական քարոզչությունը՝ Մանուկյանը նշել է. «Զիջումների մասին դրույթը բացառապես մեր դրույթը չէ։ Դրանք ԵԱՀԿ Մինսկի խմբի երեք համանախագահների մշակած առաջարկություններն են՝ համաձայնեցված Հայաստանի եւ Ադրբեջանի հետ։ Այսինքն՝ ծրագիրը, որի մասին մենք խոսում ենք, համաձայնեցված է առնվազն 5 կողմի հետ՝ Հայաստան, Ադրբեջան, ԵԱՀԿ Մինսկի խմբի երեք համանախագահ երկրներ»։ Ըստ նրա՝ դա խնդիր է, որը պետք է լուծեն Հայաստանի ներկայիս իշխանությունները։
«Այն, ինչ մենք անում ենք, գրեթե իշխանության խնդիրն է, առավել եւս, որ նրանք սկզբունքային համաձայնություն են հայտնել առաջարկած ծրագրի իրացման վերաբերյալ։ Մենք մեզ պատասխանատու ուժ ենք համարում, խաղաղություն հաստատելու անհրաժեշտություն ենք զգում, խաղաղ պայմաններում այլեւս զոհեր չենք ցանկանում՝ ինչպես դա եղել է վերջին 23 տարում։ Եւ երբ հանդիպում ես քաղաքացիների հետ, լսում նրանց կարծիքն ու մտահոգությունները, համոզվում ես, որ հասարակ քաղաքացիների շրջանում դա ավելի լավ է ընկալվում՝ ելնելով անձնական պատճառներից», -ասել է Լեւոն Տեր-Պետրոսյանի աջակիցը։
Եւ այժմ, համաձայն պատգամավորի թեկնածուի՝ այդ գաղափարն ավելի է տարածվում ու հանրաճանաչություն ձեռք բերում։
«Երկու ամիս առաջ վախ կար, «նորաձեւ չէր» խոսել խաղաղության մասին, բայց մենք համբերատար ենք եւ դանդաղ տարածում ենք այդ գաղափարը, քանի որ հավատում ենք, որ դա ճիշտ է։ Մենք հավատում ենք, որ դա է Հայաստանի զարգացման միակ ուղին։ Հավատում ենք, որ դա Հայաստանին շունչ քաշելու հնարավորություն կտա, կհանգեցնի աշխատատեղերի ստեղծմանը, երկիրը դուրս կգա շրջափակումից, ինչն ուժեղանալու հնարավորություն կտա։ Իսկ ուժեղ Հայաստանը Արցախի Հանրապետության ինքնորոշման ու անկախության գրավականն է», - ընդգծել է Արամ Մանուկյանը։
