Հայաստանը պետք է փոխի խնդիրների լուծման ներքին մոտեցումները: Քաղաքական ուժերի ներկայացուցիչների մասնակցությամբ բանավեճի ժամանակ նման տեսակետ հայտնեց «Ծառուկյան» դաշինքի ներկայացուցիչ Արարատ Զուրաբյանը:
Անդրադառնալով հարցին՝ Հայաստանին ավելի անհրաժեշտ է ԵՏՄ անդամակցությո՞ւնը, թե՞ ԵՄ-ի հետ հարաբերությունների խորացումը, քաղաքական գործիչը նշեց, որ զարգացումը հնարավոր է, եթե անգամ Լուսնի վրա հայտնվենք»: Զուրաբյանը հիշեցրեց, որ ԵՄ-ում էլ կան հետ մնացող երկրներ:
Որպես օրինակ նա նշեց Հունաստանին, որը Եվրոպայում պետականության աղբյուր է: «Այսինքն՝ հարցի դրվածքը սխալ է: Կարելի է բնակվել Հայաստանում կամ Անտարկտիդայում, Եվրոպայում կամ Ամերիկայում, քաղաքակիրթ մարդ լինել կամ հակառակը: Նույնը վերաբերում է քաղաքակրթություններին»,- նշեց Զուրաբյանը՝ ափսոսանք հայտնելով, որ մեր պետությունը ներսում այնքան չի հասունացել, որ առաջնահերթությունները հասկանա: Միեւնույն ժամանակ նա նշեց, որ եթե Եվրոպան Հայաստանին նույնիսկ գրկաբաց ընդունի, քիչ բան կփոխվի, մինչեւ երկրի ներսում տեղի չունենա խնդրի լուծման մոտեցման փոփոխությունը: «Ընտրությունները լավ քննություն են՝ արդյոք դա կլինի՞ քայլ դեպի եվրոպական արժեհամակարգը»,- նշեց Արարատ Զուրաբյանը:
