Հայաստանի ազգային սկաուտական շարժման՝ ՀԱՍԿ հասարակական կազմակերպության ներկա եւ նախկին մի շարք անդամներ դժգոհության ալիք են բարձրացրել՝ պնդելով, որ ապաքաղաքական կազմակերպության՝ Երվանդ Քոչար 17/4 հասցեում գտնվող գրասենյակն այս օրերին ծառայեցվում է՝ որպես Հայ Յեղափոխական Դաշնակցության նախընտրական շտաբ:
NEWS.am-ի հետ զրույցում սկաուտները մտահոգություն հայտնեցին, որ ՀՅԴ նախընտրական պաստառներն ու ՀԱՍԿ-ում երկար տարիներ տարբեր վարչական պաշտոններ զբաղեցրած, այժմ թիվ 4 ընտրական տարածքում ՀՅԴ-ից որպես պատգամավորի թեկնածու առաջադրված Բագրատ Եսայանի նախընտրական պաստառները փակցված են մի կառույցում, որը զբաղվում է մանկապատանեկան-կրթադաստիարակչական գործունեությամբ եւ որն իր կանոնադրության համաձայն՝ պետք է լինի ապաքաղաքական կառույց:
«ՀՀ Արդարադատության նախարարության կողմից հաստատված կանոնագրի առաջին կետերում նշված է, որ դա կամավորական, ապաքաղաքական շարժում է երիտասարդների եւ պատանիների համար, բաց է բոլորի համար՝ առանց որեւէ խտրականության: Հիմա երեխաները իրենց ամենշաբաթյա գործունեությունները անցկացնում են մի վայրում, որտեղ փակցված են կուսակցական պաստառներ, սեղաններին դրված են բուկլետներ, եւ երեխաները, իրենց կամքից անկախ, հայտնվում են որեւէ քաղաքական բեւեռում: Այսպիսով՝ երեխաների մոտ ուղղորդված դիրքորոշում է ի հայտ գալիս, եւ սա աղավաղում է սկաուտական շարժման ողջ գաղափարը: Նախընտրական քարոզչություն անել մանկապատանեկան-կրթադաստիարակչական կառույցից նույնն է, թե պաստառներ փակցնել դպրոցներում, ինչն արգելված է»,- նշեց ՀԱՍԿ-ի նախկին խմբապետներից Հայկ Կարապետյանը:
Սկաուտական շարժման նախկին առաջնորդներից մեկը, որը չցանկացավ ներկայանալ, նշեց, որ շարժման կանոնադրության վերջին կետում նշվում է, որ կազմակերպությունը 1918-1921թթ. եւ 1989-95թթ. Հայաստանի Հանրապետությունում գործած, ինչպես նաեւ սփյուռքում գործող Հայ Մարմնակրթական Ընդհանուր Միություն սկաուտական կազմակերպության գործի շարունակողն է եւ ավանդույթների կրողը:
«Հենց այս կետը շահարկելով կուսակցությունը տեւական ժամանակն է՝ իր ձեռքն է վերցրել կազմակերպության գործունեությունը: Բայց շարժման քաղաքական բաղադրիչը, որպես կանոն, թաքցվում է երեխաների ծնողներից եւ շատերն իրենց երեխաներին անդամագրում են սկաուտական շարժմանը, որ ստանան տարատեսակ գիտելիքներ եւ ձեռք բերեն կենսափորձ՝ հետագայում իրենց կյանքում լավագույնս դրսեւորվելու համար: Մեր բողոքը պետք չէ ընկալել որպես Դաշնակցություն դեմ ակցիա. Սա պարզապես դժգոհություն է սկաուտական շարժման քաղաքականացման վերաբերյալ»,- ասաց նա: