Պետք է համատեղ ուժերով մեր տարածաշրջանում կառուցենք դիմակայուն ապագա: Այս մասին, այսօր՝ ապրիլի 11-ին, Հայաստանում Իրանի Իսլամական Հանրապետության արտակարգ եւ լիազոր դեսպան Սեյեդ Քազեմ Սաջադիի հետ հանդիպման ժամանակ նշել է ՀՀ ԱԻ նախարար Դավիթ Տոնոյանը:
Հայաստանի ԱԻՆ-ից NEWS.am-ին հայտնում են, որ հանդիպման նպատակն էր քննարկել արտակարգ իրավիճակների եւ աղետների ռիսկերի նվազեցման ու կանխարգելման ոլորտում հայ-իրանական համագործակցության ծավալների ընդլայնումը:
Կողմերն ընդհանուր հայտարարի եկան առավել սերտացնել ԱԻ ոլորտում համագործակցությունը երկու երկրների միջեւ՝ նշելով, որ դեկտեմբերին ստորագրված «ՀՀ ԱԻՆ եւ ԻԻՀ ՆԳՆ միջեւ արտակարգ իրավիճակների բնագավառում համագործակցության մասին» փոխըմբռնման հուշագիրն, ըստ էության, նոր էջ է բացում համատեղ գործունեության խորացման եւ ընդլայնման համար:
Քննարկվեցին ՀՀ ԱԻՆ-ի եւ արտակարգ իրավիճակների ոլորտում Իրանի Իսլամական Հանրապետության մի շարք շահագրգիռ գերատեսչությունների միջեւ փորձի փոխանակման եւ համատեղ վարժանքների իրականացման հնարավորություններն ու համատեղ ծրագրերի իրականացման հնարավորությունները:
Իր խոսքում նախարար Տոնոյանը կարեւորեց Հայաստանի Հանրապետության եւ Իրանի Իսլամական Հանրապետության համատեղ գործունեության դերակատարումը Հարավային Կովկասի տարածաշրջանում աղետների ռիսկի նվազեցման եւ կանխարգելման հիմնախնդրում՝ նշելով նաեւ Իրանի Կարմիր մահիկի ներգրավածության կարեւորությունը՝ հատկապես Հայաստանի սահմանամերձ գոտիներում իրականացվող աշխատանքներում:
«Հարավային Կովկասը բնական եւ մարդածին աղետների ռիսկի տեսանկյունից պետք է հնարավորինս անվտանգ լինի, քանի որ տնտեսության եւ զբոսաշրջության զարգացումն առանց աղետների ռիսկի նվազեցման անհնար է: Պետք է համատեղ ուժերով մեր տարածաշրջանում կառուցենք դիմակայուն ապագա»,-շեշտեց ԱԻ նախարարը:
Ի լրումն նախարար Տոնոյանն առաջարկեց Հայաստանում Իրանի քաղաքացիների զբոսաշրջության առավել ակտիվ ժամանակահատվածում ՀՀ ԱԻՆ 911 ծառայությունում սահմանել պարսկերեն լեզվին տիրապետող օպերատորների հերթապահություն, որոնք կսպասարկեն զբոսաշրջիկների կողմից ստացվող զանգերը:
Խոսելով 2 երկրների միջեւ փորձի փոխանակման հնարավորություններից՝ դեսպանը բարձր գնահատեց պետական ոլորտում հաշմանդամ աշխատակիցների ներգրավման ԱԻՆ-ի փորձը:
Հանդիպման ավարտին պայմանավորվածություն ձեռքբերվեց նաեւ համատեղ աշխատանքներ իրականացնել ճգնաժամերին արձագանքելու անդրսահմանային մեխանիզմներ մշակելու ուղղությամբ: