Մոտ 200 մարդ որպես թեկնածու է գրանցվել մայիսին կայանալիք Իրանի նախագահական ընտրություններում։ Նման տվյալներ լրագրողներին հայտնել է Իրանի ՆԳՆ Ընտրությունների անցկացման շտաբի պետ Ալի Աստար Ահմադին, հաղորդում է «ՏԱՍՍ»-ը։
Նրա խոսքով՝ տեղի ժամանակով 12։45-ին գրանցման դիմում է ընդունվել 197 մարդուց՝ 189 տղամարդուց եւ 8 կնոջից։ Ամենատարեց թեկնածուն 82-ամյա ատամնաբույժն է։ Գրանցվածներից 54-ը գիտական աստիճան ունեն, 19-ը մարտական գործողությունների մասնակիցներ են, մանրամասնել է Ահմադին։
Մեծ ռեզոնանս է առաջացրել երկրի նախկին նախագահ Մահմուդ Ահմադինեժադի՝ որպես նախագահի թեկնածու գրանցվելը։
Նշենք, որ երեքշաբթի օրը Իրանի Իսլամական Հանրապետության ՆԳՆ-ում սկսվել է մայիսի 19-ին կայանալիք նախագահական ընտրությունների թեկնածուների գրանցումը։ Համաձայն երկրի Սահմամադրության՝ նախագահ կարող է դառնալ երկրի 40 տարեկանից բարձր ցանկացած տեղաբնիկ։ Դիմումները կընդունվեն 5 օրվա ընթացքում, եւ արդեն առաջին օրը ավելի քան 100 մարդ է գրանցվել։