Բաքվում Ռուսաստանի դեսպանատունը շարունակում է ուշադիր հետեւ ել Լապշինի գործին առնչվող իրավիճակին։ Այս մասին հայտնել է Ռուսաստանի ԱԳՆ-ի պաշտոնական ներկայացուցիչ Մարիա Զախարովան։
Նրա խոսքով հիմա քննությունը նրա գործով շարունակվում է ( քննության ժամկետը երկարացվել է մինչեւ հուլիսի 15-ը)։ «Պահման պայմանների կապակցությամբ գանգատներ նա չի արտահայտել։ Նրա առողջական վիճակի վատացման կապակցությամբ Ռուսաստանի քաղաքացու ազգականների մտահոգության մասին քննչական մեկուսարանի ղեկավարությունը տեղեկացված է։ Դեսպանատան համառ խնդրանքով իրականացվել է Լապշինի բուժհետազոտություն։ Ես չեմ մանրամասնի, կարող եմ ասել, որ մենք վերահսկողության տակ ենք պահում իրավիճակը։ Դեսպանատունը մշտական կապ է պահպանում Ռուսաստանի քաղաքացու փաստաբանի ու ազգականների հետ»,- նշել է նա։
Հիշեցնենք, որ Ռուսաստանի, Իսրայելի եւ մի շարք երկրների քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։
Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17–ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26–ին Մինսկի դատարանը մերժել էր Լապշինի փաստաբանների բողոքը:
Ռուսաստանը եւ Իսրայելը փորձել են հասնել արտահանձնման որոշման չեղարկմանը: Սակայն Բելառուսի նախագահ Ալեքսանդր Լուկաշենկոյի վերջերս կայացած մամուլի ասուլիսից հետո ակնհայտ էր, որ Լապշինին կարտահանձնեն:
Փետրվարի 7-ի երեկոյան Ալեքսանդր Լապշինին Բաքու են տեղափոխել: