Բնապահպան Կարինե Դանիելյանը կարեւորում է Երեւանի նոր ձեւավորվելիք ավագանու բազմաբեւեռ լինելը: Այսօր՝ ապրիլի 19-ին, լրագրողների հետ հանդիպման ժամանակ բնապահպանը նշել է, որ այս առումով կարեւոր է Երեւանի ավագանու ընտրություններին «Ելք» դաշինքի ու «Երկիր ծիրանի» կուսակցության մասնակցությունը:
«Կուզենամ, որ միաբեւեռ ավագանի չունենանք, ինչպես Ազգային ժողովում էր: Այս առումով շատ ուրախ եմ, որ «Ելքն» ու «Երկիր ծիրանին» մասնակցում եմ ավագանու ընտրություններին»,- ասաց նա:
Կարինե Դանիելյանը նշեց, որ Երեւանի քաղաքապետ, քաղաքապետի թեկնածու Տարոն Մարգարյանն այս հինգ տարիների ընթացքում որոշ խնդիրներ լուծել է, սակայն կուտակվել են նաեւ բազում խնդիրներ, որոնք առաջնահերթ լուծման կարիք ունեն: Դրանցից մեկը բնապահպանի խոսքով, քաղաքի ճարտարապետության հարցն է:
«Այն, ինչ կատարվում է քաղաքի կենտրոնում, շատ վտանգավոր է: Անկախության տարիներից հետո ամեն ինչ արվել է քաղաքի կենտրոնը գերծանրաբեռնված դարձնելու համար: Հանրապետության հրապարակի տարածքում բարձրահարկ շենքեր են կառուցում մեկը մյուսի հետեւից, այդ ճարտարապետությունն ազգի խայտառակությունն է»,-ասաց նա:
Բնապահպանի խոսքով, Երեւանի առջեւ այսօր ծառացած խնդիրները երկրի սխալ կառավարման արդյունք են. «Ընդհանուր երկրի համարակարգն է հիմնականում խանգարում քաղաքի զարգացմանը, որովհետեւ առաջնային է որոշ մարդկանց հարստացնելը, որը խանգարում է երկրի, քաղաքի զարգացմանը: Այդ մոտեցումն առաջին հերթին արտահայտվում է քաղաքաշինության մեջ, օրինակ, ինչն է ստիպում անընդհատ խտացնել կենտրոնը, շենքեր կառուցել, իհարկե, որոշ մարդկանց հարստացնելու խնդիրը, որը, սակայն, քաղաքի շահերից չի բխում»:
