Չինական Xiaomi ընկերությունն անոնսել է Mi6 սմարթֆոնի թողարկումը, որն ունենալու է երկու տեսախցիկ ու ֆլագմանյան բնութագրեր։ Սարքի մասին տեղեկությունն ընկերությունը հրապարակել է Twitter–ում, գրում է Lenta–ն։
Սմարթֆոնը ունենալու է 5․15 դյույմ տրամագծով դիսփլեյ՝ կապույտ զտիչով ու լուսավորության նվազագույն նիշով՝ աչքերի պաշտպանության համար։ Տեսախցիկը պատրաստված է iPhone 7 Plus-ի նմանությամբ՝ երկու մոդուլներն ունեն 12 մեգապիկսել թողունակություն ու օպտիկական կայունացում, դրանցից մեկը երկակի զում ունի ու դիմանկարային լուսանկարներ ստեղծելու հնարավորություն՝ լղոզված ֆոնով։
Mi6 -ն ունի ութմիջուկային Qualcomm Snapdragon 835 պրոցեսոր, վեց գիգաբայթ օպերատիվ հիշողություն ու մինչեւ 128 գիգաբայթ կուտակիչ՝ առանց հիշողության քարտի աջակցության։ Սարքի կորպուսը պատրաստված է ապակուց ու մետաղից։ Սմարթֆոնը հասանելի է երեք գույնով՝ սեւ, սպիտակ ու կապտաոսկեգույն ։ Դրա հետ միասին ընկերությունը կթողարկի նաեւ կերամիկական կորպուսով պրեմիալ տարբերակը։
Սարքի ամենաէժան տարբերակը կարժենա 2․5 հազար յուան, իսկ ամենաթանկը՝ 3 հազար յուան։ Վաճառքը Չինաստանում կսկսվի ապրիլի 28-ին։