Ըստ պաշտոնական վիճակագրության, մարտին հայրենական արդյունաբերությունը նորից դրական դինամիկա է գրանցել։ Արտադրանքի ֆիզիկական ծավալի աճի տեմպը, չնայած մի քիչ դանդաղել է փետրվարի համեմատ, բայցեւայնպես կազմել է երկնիշ թիվ՝ 17․2 տոկոս։ Քանի որ Հայաստանի Վիճվարչության նախնական տեղեկությունները չեն պարունակում մանրակրկիտ մանրամասներ, դիտարկենք հունվար- փետրվար ամիսների ցուցանիշները։
Տարվա առաջին երկու ամիսներին արդյունաբերության արտադրանքի ֆիզիկական ծավալի աճի տեմպը կազմել է 16․1 տոկոս։ Մետաղական հանքաքարի արտահանումը 1․5 տոկոսով նպաստել է ընդհանուր աճին։ Ավելի մեծ է եղել մշակող արդյունաբերության ավանդը՝ 12․0 տոկոս։ Այս ոլորտի վրա ազդել է սննդամթերքի ու ըմպելիքների արտադրության ծավալի աճը, նաեւ մետաղական հանքաքարի արդյունահանման հետ կապված հիմնական մետաղների արտադրությունը։ Ընդհանուր ցուցանիշը 2․1 տոկոսով մեծացրել է նաեւ բնական գազը ։ Միանգամայն հնարավոր է, որ դրան նպաստել է ցուրտ ձմեռը։
Այս տարվա փետրվարին Հայաստանում օդի միջին ամսական ջերմաստիճանը նորմայից 2-4 աստիճանով ցածր է եղել (խիտ բնակեցված Արարատյան դաշտավայրում՝ 6-8 աստիճանով)։ Մեկ տարի առաջ դիտարկվում էր հակառակ պատկերը՝ միջին ամսական ջերմաստիճանը հանրապետությունում 4-5 աստիճանով նորմայից բարձր էր։ Ջերմաստիճանի նման տատանումը կարող էր հանգեցնել ջեռուցման համար բնական գազի ավելի մեծ ծախսի։
ԵՏՄ վարկանիշում Հայաստանը երկրորդ տեղում է։ Առաջին տեղում Ղրղզստանն է, որը պարզապես ֆանտաստիկ ցուցանիշ է ցույց տվել՝ արդյունաբերության արտադրանքի ֆիզիկական ծավալի 35․9 տոկոսի աճ։ Երրորդ տեղում Ղազախստանն է ՝ 5․8 տոկոս, հետո Բելառուսը՝ 4․3 տոկոս։ Ամենավատ ցուցանիշները Ռուսաստանինն են։
Հունվարը ռուսաստանյան արդյունաբերության համար հուսադրող էր՝ արտադրանքի ֆիզիկական ծավալը տարեկան կտրվածքով աճել է 2․3 տոկոսով։ Սակայն փետրվարը, 2․7 տոկոսի անկումով, պարզապես ջնջել է այդ ձեռքբերումը։ Մարտին արդյունաբերությունը նորից աճ է գրանցել, բայց մեկ տոկոսից էլ քիչ։
Տարվա առաջին եռամսյակը փակվել է աճի խորհրդանշական ցուցանիշով՝ 0․1 տոկոս։ Նկատենք, որ զրոյին այդքան մոտ նիշը կարելի է վերագրել նաեւ վիճակագրական սխալմունքին։ Այդ հանգամանքը Ռուսաստանի առանձին փորձագետներին առիթ էր տվել կասկածել արդյունաբերության աճի իսկությանը։ Բայց նկատենք, որ առաջատար ոլորտների մասով զրոյից շեղումն արդեն նկատելի է։ Եւ այսպես բնական հանածոների արդյունահանումը աճել է 1․2 տոկոսով, իսկ ահա վերամշակող արդյունաբերության արտադրանքը կրճատվել է 0․8 տոկոսով։
Սմբատ Գրիգորյան