Երեւանի ավագանու ընտրությունների քարոզարշավին ՀՀԿ-ն նախընտրում է ուղղակի բակային հանդիպումները։ Այդ մասին այսօր՝ ապրիլի 20-ին ՀՀԿ Գործադիր մարմնի նիստից հետո լրագրողներին ասել է ՀՀԿ մամուլի քարտուղար Էդուարդ Շարմազանովը։

«Մենք սկսելու ենք մեր քարոզչությունը ապրիլի 21-ին, ոչ աշխատանքային ժամի։ Մեր ավագանու թեկնածուները՝ քաղաքապետ Տարոն Մարգարյանի գլխավորությամբ, քարոզչությունը սկսելու են Էրեբունի վարչական շրջանից»,- ասել է Շարմազանով եւ հավելել. «Մենք նախընտրել ենք ուղղակի բակային հանդիպումները, քանի որ մեր քաղաքացիների եւ քաղաքապետի մեր թեկնածուի միջեւ միջնորդներ պետք չեն»։

Նրա խոսքով, ենթաշտաբերը ձեւավորված են, շուրջ 460 ենթաշտաբ։

Հարցին, թե ինչու Տարոն Մարգարյանը չի ցանկանում բանավիճել իր մրցակիցների հետ, Շարմազանովը պատասխանել է. «Մենք ենք որոշում մեր օրակարգը։ Շատ մեծ ցուցակ ունենք, 195 հոգանոց, եթե հարմար գտնենք, մեր ցուցակի 60-րդ, կամ 15-րդ թեկնածուին կասենք կհանդիպի «Ելք»-ի առաջնորդների հետ»։