ԵԽԽՎ նախագահ Պեդրո Ագրամունտը համաձայնել է մասնակցել Սիրիա իր այցելության հարցով լսումներին, ասվում է ԵԽԽՎ հաղորդագրության մեջ։
«ԵԽԽՎ նախագահ Պեդրո Ագրամունտը, հաշվի առնելով Վեհաժողովի զգալի քանակության անդամների խնդրանքը, համաձայնել է մասնակցել Սիրիա կատարած իր այցելության թեմայով լսումներին, որոնք բաց են Վեհաժողովի բոլոր անդամների համար»,- ասվում է փաստաթղթում։ Լսումները կկայանան երեքշաբթի։
Ավելի վաղ, Վեհաժողովի գարնանային նստաշրջանի աշխատանքների առաջին օրը, Ագրամունտը ներողություն էր խնդրել Սիրիա կատարած այցելության համար՝ նշելով, որ այդ ուղեւորությունը սխալ էր։ Նա հավելել է, որ Վեհաժողովում շատերն են այդ ուղեւորության կապակցությամբ մտահոգություն արտահայտել։
Ներողության խոսքից անմիջապես հետո խորհրդարանականները ԵԽԽՎ նախագահից պահանջել են հրաժարական տալ։
ԵԽԽՎ կանոններում չկան դրույթներ Վեհաժողովի նախագահի իմփիչմենթի մասին։ ԵԽԽՎ նախագահը կարող է միայն հոժարակամ հրաժարական տալ։