«Սասնա ծռերին» սնունդ հասցրած Արթուր Սարգսյանի աշխատանքները «Վերնիսաժում» շարունակում են պահանջված մնալ: Այս մասին NEWS.am-ի հետ զրույցում ասաց «Հաց բերողի» ընկերը՝ Սամվել Թադեւոսյանը: Նա նշեց, որ «Վերնիսաժում» շատերն են շարունակում հետաքրքրվել, հարցնել նրա աշխատանքների մասին:

«Նրա եղբայրը ավարտին է հասցնում  կիսատ աշխատանքները, բերում է, որ վաճառենք: Վերնիսաժում Արթուրի տաղավարն օգտագործվում է մեր կողմից, որտեղ իր աշխատանքներն ենք նաեւ վաճառում»,-ասաց նա:

Սամվել Թադեւոսյանը նշեց, որ «Հաց բերողի» տաղավարի մոտ կատարվող իրարանցումը նկատելով՝ հաճախ են զբոսաշրջիկները մոտենում  եւ ցանկանում իմանլա, թե ով է Արթուր Սարգսյանը:

«Վերնիսաժում ռուսներ էին, հարց տվեցին՝ ով ա ինքը, չգիտեի, թե ոնց բացատրեի էդ մարդկանց, որ հասկանային, թե ով է եղել: Երկու բառով բնութագրեցի՝ մարդ, որին իշխանությունն անվանեց տեռորիստ, բայց ժողովուրդը՝ «Հաց բերող»»:

Հիշեցնենք, որ «Սասնա ծռերին» օժանդակելու մեջ մեղադրվող Արթուր Սարգսյանը՝ «Հաց բերողը», մարտի 16-ին մահացել էր «Արմենիա» բժշկական կենտրոնում:

Արթուր Սարգսյանը 2016 թվականի ամռանը ոստիկանության Երեւանի ՊՊԾ գնդի տարածքը գրավելու օրերին կրակահերթերի տակ ավտոմեքենայով ճեղքել էր ոստիկանական պատն ու սնունդ տարել «Սասնա ծռեր» զինված խմբին։