Ռուսաստանին անհրաժեշտ է կրճատել սպառումը՝ հօգուտ ներդրումների աճի։ Այս մասին NEWS.am–ի թղթակցին ասել է Ռուսաստանի ԿԲ-ի նախագահի առաջին տեղակալ Կսենիա Յուդաեւան՝ ԱՄՀ ու ՀԲ-ի Գարնանային ամենամյա հանդիպումների ժամանակ՝ Վաշինգտոնում։
2015-2016 թթ ռուսաստանցիները սկսել են զգալիորեն շատ գումար տնտեսել։ Դա օգնել է կատարել ԿԲ-ի ու ՖԻննախի 2 նպատակները՝ նվազեցնել գնաճն ու ստեղծել նախապայմաններ՝ ներդրումների աճի համար։
2014-ին 100 վաստակած ռուբլուց Ռուսաստանի բնակիչները միջին խնայում էին ընդամենը 9 ռուբլի, իսկ 2015-ին՝ արդեն 15․4 , 2016-ին էլ՝ 14․9 ռուբլի։
Արդյունքում 2015-ին մեծածախ առեւտուրը կրճատվել է 10 տոկոսով, ինչն աննախադեպ անկում է 1970-ից հետո։
Ռուսաստանը հայկական արտադրանքի խոշորագույն ներմուծողն է։ Ռուսաստանի շուկաներ է արտահանվում հայկական մրգերի ու բանջարեղենի , նաեւ պտղաբանջարեղենային պահածոների, ձկան, պանրի, գինու ու կոնյակի արտահանման մեծ մասը։
Ռուսաստանում ապրանքների ու ծառայությունների ցածր պահանջարկը օգնել է զսպել բարձր գնաճը։ Արդյունքում , եթե 2014-ին այն կազմում էր մոտ 11․4 տոկոս, 2015-ին՝ 12․9 տոկոս, ապա 2016-ին՝ ընդամենը 5․4 տոկոս։
«Ըստ էության խնայողությունների նորմայի աճն է հենց եղել այն պատճառներից մեկը, որ մենք կարողացել են նվազեցնել գնաճը։ Ու դա վերաբերում է ոչ միայն ԿԲ-ի քաղաքականությանը, այլ երկրի ընդհանուր քաղաքականությանը։ Մեզ պետք է ներդրումային աճ, ու դա ենթադրում է որոշակի տեղաշարժ՝ սպառման հաշվին աճից դեպի ներդրումների հաշվին աճ»,- նկատել է Յուդաեւան։
Նա ուշադրություն է դարձրել, որ խնայողություններից դեպի ներդրումներ ուժեղ տեղաշարժ ակնկալել չարժե, բայց որոշակի արդյունքների հնարավոր է հասնել։