Կենտրոնական ընտրական հանձնաժողովի նախագահ Տիգրան Մուկուչյանը ընտրական ցուցակների հետ կապված որեւէ խնդիր չի տեսնում: Այս մասին նա հայտարարեց ելույթ ունենալով Սահմանադրական դատարանի նիստում, որի ընթացքում քննվում է «Կոնգրես-ՀԺԿ» դաշինքի՝ ապրիլի 2-ին կայացած խորհրդարանական ընտրությունների արդյունքները վիճարկող հայցը:
Ավելի վաղ հայցվոր կողմը հայտարարել էր բազմաթիվ խնդիրների մասին, այդ թվում՝ կապված ընտրական ցուցակների հետ:
Սրա հետ կապված Տիգրան Մուկուչյանը հիշեցրեց, որ ցուցակները ընտրություններից 3 շաբաթ առաջ ընտրողներին հասանելի էին, այդ թվում՝ ԿԸՀ-ի կայքի միջոցով:
Եվ այս ամբողջ ընթացքում միայն մեկ դիմում է եղել, հավաստիացրեց Մուկուչյանը:
Նա շեշտեց, որ առաջին անգամ տեղամասերում տեղադրված էին տեսախցիկներ, եւ քվեարկության ընթացքը համացանցում հեռարձակվել է: Նա միեւնույն ժամանակ հիշեցրեց, որ եթե նույնիսկ բոլոր տեսախցիկները շարքից դուրս գային, եւ հեռարձակումն ընդհանրապես ընդհատվեր, դա, միեւնույն է, օրենքի խախտում չէր լինի, եւ հակառակը պնդելը սխալ է:
Մուկուչյանի կարծիքով՝ Հայաստանը ընտրական գործընթացի թափանցիկության եւ ընտրողների գրանցամատյանում տվյալների հասանելիության տեսակետից շատ լավ դիրքում է:
Եզրափակելով՝ Տիգրան Մուկուչյանն ընդգծել է, որ պատասխանողը հայցն անհիմն է համարում, եւ այն մերժման է ենթակա։