Ղարաբաղյան հակամարտության արագ եւ խաղաղ, եւ արդարացի հանգուցալուծման համար կա մեկ խոչընդոտ, դա Ադրբեջանի ապակառուցողական մոտեցումն է։ Այդ մասին ՀՀԿ ԳՄ նիստից հետո լրագրողների հետ զրուցյում ասել է ՀՀԿ մամուլի քարտուղար Էդուարդ Շարմազանովը:
Մեկնաբանելով վաղը կայանալիք եռակողմ հանդիպումը՝ նա նշել է. «Մեկ անգամ չէ, որ մենք նշել ենք, որ դրական ենք գնահատում Մինսկի խմբի ջանքերը` ուղղված Լեռնային Ղարաբաղի հակամարտության խաղաղ կարգավորմանը, բայց մեկ անգամ չէ, որ ասել ենք` խնդրի արագ, խաղաղ, եւ արդարացի հանգուցալուծման համար կա մեկ խոչընդոտ, դա մեր հարեւանի՝ Ադրբեջանի ապակառուցողական մոտեցումն է»։
Ըստ Շարմազանովի, Վիեննայում եւ Սանկտ Պետերբուրգում ձեռքբերված պայմանավորվածությունները պետք է կյանքի կոչվեն: «Եթե դրանք կյանքի չեն կոչվում, խոչընդոտների են հանդիպում, կամ մասամբ են կյանքի կոչվում, պա բացառապես Ադրբեջանի մեղքով»,- ասել է Շարմազանովը հավելելով, թե հայկական կողմի դիրքորոշումն այս հարցում չի փոխվել եւ հստակ է:
