Աշխատանքային նոր օրենսգրքում պետք չէ չափից ավելի շատ իրավունքներ ամրագրել աշխատողներին եւ պարտականություններ՝ գործատուներին: Մայիսի 1-ին կայացած մամուլի ասուլիսի ժամանակ այս մասին հայտարարեց Աշխատանքի եւ սոցիալական հարցերով նախարարության Զբաղվածության վարչության պետ Թադեւոս Ավետիսյանը՝ մեկնաբանելով Աշխատանքային օրենսգրքի նոր խմբագրման նախագծի աշխատանքները, որը պետք է պատրաստ լինի 9 ամսվա ընթացքում:
Նա չհիշատակեց (իսկ դրա վերաբերյալ հարցը շրջանցեց), որ զարգացած երկրներում դատարանները, գործատուները եւ կառավարությունը մեկը մյուսին կապված չեն եւ իրար չեն պաշտպանում: Իսկ աշխատողների եւ գործատուների բանակցություններին պրոֆմիություններն են մասնակցում: Եվ եթե Արեւմուտքում մտածում են, թե ինչպես նրանց ավելորդ իրավունքներ չտան, ապա Հայաստանում քչերը գիտեն, որ պրոֆմիությունները դեռեւս գործում են:
Սա, սակայն, Աշխատանքի նախարարությանը չի զարմացնում: Լավագույնի հավատով աշխատողներին հորդորում են պայմանավորվել Սամվել Ալեքսանյանի, Միհրան Պողոսյանի, Գագիկ Ծառուկյանի եւ այլ գործարարների հետ՝ աշխատանքային պայմանագրերի, լիարժեք արձակուրդի եւ արտաժամյա աշխատանքի լրավճարի շուրջ: «Աշխատողները պետք է կարողանան գործատուի հետ պայմանավորվել: Բանակցելու մշակույթը տնտեսության ատրիբուտներից է»,- ասաց Ավետիսյանը:
