Twitter-ը Bloomberg Media-ի հետ համատեղ ծրագրում է ստեղծել լրատվության շուրջօրյա հեռարձակման ծառայություն։ Նախագիծն իրականացվելու է սոցցանցի հարթակի վրա առցանց հեռուստաալիքի ձեւով, գրում է The Wall Street Journal–ը։

Ենթադրվում է, որ նոր ծառայությունը կգործարկվի արդեն այս տարվա աշնանը։ Հեռուստաալիքը, որը դեռ անվանում չունի, իրական ժամանակում հեռարձակելու է սեփական արտադրության նորություններ աշխարհի տարբեր անկյուններից, նաեւ ցուցադրելու է Twitter-ի օգտատերերի ստուգված տեսահոլովակները։

Twitter--ի գործադիր տնօրեն Ջասթին Սմիթը նշել է, որ շատերը նորություններ են դիտում հեռուստաեթերում ու միանգամից դրանց մասին մեկնաբանություններ հրապարակում սոցցանցում։ Իսկ ընկերությունները ուզում են միավորել այդ երկու գործողությունները։

«Մենք իրոք համարում ենք, որ կկարողանանք գրավել լսարան, որը չի վճարում հեռուստատեսության համար ու հեռուստացույց դիտում է սոցցանցից օգտվելիս ո ւ մենք կարծում ենք, որ Bloomberg–ը մեզ համար այս հարցում իդեալական գործընկեր է»,- վստահեցրել է Twitter -ի ֆինանսական տնօրեն Էնթոնի Նոթոն։

Twitter-ի ու Bloomberg-ի ներկայացուցիչները թերթին չեն հայտնել համաձայնագրի ֆինանսական կողմի մասին։ Սակայն նշում են, որ Bloomberg-ն է ամբողջովին վերահսկելու հեռուստաալիքի բովանդակությունը։ Բացի դրանից հեռուստաալիքով գովազդ է ցուցադրվելու։