Հայաստանը մեծագույն սիրով է Սիրիայի ժողովրդին հումանիտար օգնություն տրամադրում, եւ մենք անչափ երախտապարտ ենք ռուս գործընկերներին, որ նրանք այն Ռուսաստանի ՌՕՈւ-ի օդանավերով տեղ հասցնելու հնարավորություն են ընձեռում: Այս մասին Հայաստանի պաշտպանության նախարար Վիգեն Սարգսյանը հայտարարել է «Ինտերֆաքսի» հետ հարցազրույցում:
«Մենք այս ծրագիրը կշարունակենք նաեւ ապագայում: Մեր երկրների նախագահների հանձնարարականների հիման վրա մենք մշակում ենք հումանիտար ականազերծմանը հայ սակրավորների մասնակցության հնարավորության հարցը, որը Ռուսաստանն իրականացնում է Սիրիայում»,- նշել է Վիգեն Սարգսյանը:
Նրա խոսքով՝ սպառնալիքների գլոբալացման պատճառով ռազմաքաղաքական ոլորտում երկրների համագործակցությունը պետք է ուղղված լինի խաղաղության եւ անվտանգության հաստատմանը: «Մենք այս մասին հրապարակայնորեն ասում ենք ե՛ւ ՀԱՊԿ-ի ձեւաչափում, ե՛ւ երկկողմանի մակարդակում»,- հավաստիացրել է նախարարը:
«Ռուսաստանը մեծապես աջակցում է Հայաստանի Զինված ուժերի ամրապնդմանը: Այս պահին Ռուսաստանի հետ մեծ թվով ծրագրեր ունենք՝ մեր կուրսանտների ուսուցումից մինչեւ գործողությունների համատեղ ծրագրումը: Մենք ստեղծել ենք զորքերի միավորված խմբավորում, կա հակաօդային պաշտպանության ընդհանուր համակարգ, ռազմատեխնիկական համագործակցության շատ թեմաներ ունենք: Այցի շրջանակում ես հանդիպել եմ արդյուաբերության եւ առեւտրի նախարար Դենիս Մանտուրովի հետ, մենք անցկացրել ենք հայ-ռուսական արդյունաբերական համաժողով: Մենք ծանոթացրել ենք ռազմաարդյունաբերական համալիրի ոլորտի մեր արտադրողներին, որպեսզի նրանք կարողանան համատեղ գործունեության մասին ուղիղ պայմանավորվածությունների հասնել»,- տեղեկացրել է Վիգեն Սարգսյանը: