Երեւանի պրոբլեմը անսարք վերելակները չեն միայն, անանացանելի ճանապարհները, փոշին ու կեղտը չէ միայն, այս քաղաքի խնդիրը համակարգային է։ Այդ մասին այսօր՝ մայիսի 11-ին Հյուսիսային պողոտայում ընթացող հանրահավաքում հայտարարել է «Ելք» դաշինքից ԱԺ պատգամավոր Արամ Սարգսյանը։

«Իսկ խնդիրը համակարգային կարող է լուծել նոր ուժը, ընդդիմությունը, որովհետեւ խնդիրները իշխանությունն էստեղծել եւ նա խնդիր լուծող չէ։ Միայն հակադիր համակարգի պարագայում է, որ փոխադարձ վերահսկողության արդյունքում փոփոխություններ կլինեն»,- նշեց Արամ Սարգսյանը։

Նրա խոսքով, իշխանությունն ամեն ինչ անում է ժողովրդավարության պատրանք ստեղծելու համար։ «Աշխարհում շատ երկրներ անցել են այդ կեղծ ժողովրդավարությամբ։ Կեղծ ժողովրդավարությունը ոչինչ չի տալիս, դա արագ հասկացան եվրոպացիները։ Միայն իրական ժողովրդավարության պարագայում է, որ կարելի է բան փոխել, առաջընթաց ունենալ»,- ասել է նա։

Ըստ Արամ Սարգսյանի, «Ելք» դաշինքի թիմի համար անհաղթահարելի խնդիրներ չկան։ «Կուսակցությունները շատ-շատ են, բայց ելքը մեկն է»,- ասել է Արամ Սարգսյանը՝ կոչ անելով Երեւանի ավագանու ընտրություններում ձայն տալ «Ելք» դաշինքին։