Եթե չունենանք քաղաքացի, չենք կարող ունենալ անկախ պետականություն եւ արժանապատիվ կյանք։ Այդ մասին այսօր՝ մայիսի 12-ին Ազատության հրապարակում ընթացող համերգ-հանրահավաքին հայտարարել է «Երկիր ծիրանի» կուսակցության նախագահ, Երեւանի քաղաքապետի թեկնածու Զարուհի Փոստանջյանը։
Ըստ Փոստանջյանի, վերջին 25 տարիները մեր հայ ժողովրդին պատճառեցին այնպիսի վնասներ, որոնք, ըստ որոշ կարծիքների, դարձել են անդառնալի։ «Մեր հայրենիքից հեռացել է 1,5 մլն քաղաքացի։ Երեւանը ոչ միայն կարիք ունի գեղեցիկ շենքերի, անտառածածկ ու կանաչ տարածքների, այլեւ քաղաքացու կարիք ունի։ Մեզ փորձել են համոզել այս տարիներին, որ մենք քաղաքացիներ չենք»,- ասել է Փոստանջյանն ու հավելել. ««Երկիր ծիրանին» ասում է, եթե չունենանք քաղաքացի, չենք կարող ունենալ անկախ պետականություն եւ արժանապատիվ կյանք»։
Նրա խոսքով, մեկ միլիոնից ավել մարդ Հայաստանում պաշտոնապես աղքատության մեջ է գտնվում։ «Աղքատ մարդը խոցելի է, իսկ խոցելի մարդը չի կարող իրացնել իր իրավունքները։ Այդ խոցելիությունից օգտվել են շատերը, այս պահին օգտվում է հանրապետական հանցագործների կուսակցությունը»,- ասել է նա։
Փոստանջյանը պահանջում է սահմանադիր օրենքներ ընդունել, եւ ժողովրդին թույլ տրվի մասնակցել ընտրություններին՝ անկախ նրանից, թե որտեղ են գտնվում, Երեւանում, թե Լոս Անջելեսում։
Նշենք, որ հանրահավաքից հետո կայանալու է Ռոբեն Հախվերդյանի համերգը։