«Ելք» դաշինքի ձեռք բերած ապացույցները վկայում են այն մասին, որ Երեւանում գործում է ընտրակաշառքի հստակ կազմակերպված համակարգ՝ Ոստիկանության բարձր հովանու ներքո։ Այս մասին մայիսի 12-ին հայտնել է ԿԸՀ-ում «Ելք» դաշինքի լիազոր ներկայացուցիչ Վահագն Հովակիմյանը, ներկայացնելով դաշինքի դիմումները ԿԸՀ-ի արտահերթ նիստի ժամանակ։
Ըստ դաշինքի տրամադրության տակ եղած փաստաթղթերի, որոնք վերաբերում են Հայաստանի Ոստիկանության ՊՊԾ գնդին․ Հովակիմյանի խոսքով, հասկանալի է դառնում, որ ՊՊԾ գունդը ՀՀԿ նախընտրական շտաբին է փոխանցում աշխատակիցների անունները ու թե նրանցից ով քանի ձայն կարող է ապահովել Երեւանի ավագանու ընտրություններին։
Վահանգն Հովակիմյանը ընթերցել է ՊՊԾ գնդի աշխատակիցների մի քանի անուններ, որոնց առջեւ, նրա վստահեցմամբ, գրված է, թե քանի ձայն նրանք կարող են ապահովել։ Նա շեշտել է, որ աշխատակիցների ընդհանուր քանակը 60 է։
