ՀՀ քննչական կոմիտեի Երեւան քաղաքի քննչական վարչության Էրեբունի եւ Նուբարաշեն վարչական շրջանների քննչական բաժնում ձեռնարկված միջոցառումների արդյունքում պարզվել են թիվ 10/29 ընտրատեղամասում լրագրողի մասնագիտական օրինական գործունեությանը խոչընդոտելու հանգամանքները:
ՀՀ Քննչական կոմիտեից NEWS.am-ին հայտնում են, որ 2017թ. մայիսի 14-ին «armtimes.com» ինտերնետային կայքում հոդված էր տեղադրվել առ այն, որ Երեւան քաղաքի ավագանու ընտրությունների ընթացքում թիվ 10/29 ընտրատեղամասում հարձակվել են «armtimes.com»-ի լրագրողի վրա՝ փորձելով խլել նրա հեռախոսը:
Նշված հրապարակումը դատախազությունն ուղարկել էր ՀՀ ՔԿ ԵՔՔՎ Էրեբունի եւ Նուբարաշեն վարչական շրջանների քննչական բաժին՝ մատնանշված հանգամանքներն ստուգելու։ Նյութերի նախապատրաստման ընթացքում պարզվել է, որ լրագրողը ՀՀ Կենտրոնական ընտրական հանձնաժողովում հավատարմագրված ԶԼՄ ներկայացուցիչ է եւ ընտրատեղամասում մայիսի 14-ին լուսաբանել է Երեւանի ավագանու ընտրությունների քվեարկության ընթացքը: Ժամը 12:00-ի սահմաններում լրագրողն իր բջջային հեռախոսով կատարել է տեսագրություն, որի ընթացքում մի երիտասարդ հրել է նրան, հարվածել, խանգարել տեսանկարահանելուն՝ փորձելով վերցնել նրա հեռախոսը՝ այդպիսով խոչընդոտելով լրագրողի մասնագիտական օրինական գործունեությանը:
Նկատի ունենալով, որ նախապատրաստված նյութերում առկա են ՀՀ քրեական օրենսգրքի 149-րդ հոդվածի 1-ին մասով նախատեսված հանցագործության հատկանիշներ՝ հաղորդումն ուղարկվել է ըստ քննչական ենթակայության՝ ՀՀ հատուկ քննչական ծառայություն:
