Բրիտանիայի մայրաքաղաքի իշխանությունները անվտանգության ուժեղացված միջոցներ են մտցնում՝ կապված Մանչեսթերի ահաբեկչության հետ: Այս մասին հայտարարել է Լոնդոնի քաղաքապետ Սադիկ Հանը, փոխանցում է ՏԱՍՍ-ը:
«Ես Սքոթլենդ Յարդի հետ մշտական կապ եմ պահպանում, որը վերանայում է Լոնդոնում անվտանգության ապահովման մակարդակը: Լոնդոնի փողոցներում ավելի մեծ թվով ոստիկաններ կլինեն»,- նրա խոսքն է մեջբերել The Guardian պարբերականը:
Ավելի վաղ Լոնդոնի «Վիկտորիա» երկաթուղային կայարանի մոտ կասկածելի փաթեթ է հայտնաբերվել: Ոստիկանությունը շրջապատել է Բուքինգեմյան պալատ տանող ճանապարհը եւ կայարանին հարակից մյուս փողոցները, իսկ ուղեւորներին տարհանել է: Փաթեթի ստուգումից հետո պարզվել է, որ այն վտանգ չի ներկայացնում:
Վերջին տվյալներով՝ Մանչեսթերի փակ մարզադաշտում ահաբեկչության հետեւանքով զոհվել է 22 մարդ՝ ներառյալ երեխաներ, եւս 59 մարդ վնասվածքներ է ստացել: Անհայտ ծագմամբ պայթուցիկ սարքի դետոնացիան տեղի է ունեցել համերգային դահլիճից դուրս՝ նախասրահում, տեղական ժամանակով ժամը 22:35-ին, ամերիկյան փոփ երգչուհի Արիանա Գրանդեի ելույթն ավարտվելուց անմիջապես հետո: Ականատեսների վկայությամբ՝ հանդիսատեսի մեծ մասը դեռահասներ էին:
