Տասնյակ հազարավոր մարդիկ են դուրս եկել Ռիո դե Ժանեյրոյի փողոցներ՝ պահանջելով Բրազիլիայի նախագահ Միշել Թեմերի հրաժարականը, կոշտ բարեփոխումների դադարեցումն ու արտահերթ ընտրությունների անցկացում։ Բողոքի ցույցերը վերածվել են բախումների ոստիկանության հետ, որը արցունքաբեր գազ էր կիրառել ամբոխին ցրելու համար, հայտնում է AFP-ն։

Գործակալության տվյալներով ակցիան կազմակերպել էին արհմիություններն ու ձախ խմբերը։ Ոստիկանության գնահատականով, ակցիային մասնակցել է 25 հազար մարդ, սակայն ցուցարարները հավաստիացնում են, որ քանակն ավելի մեծ է եղել։ Երբ ցուցարարները մոտեցել են նախագահական նստավայրին, նրանց այնտեղ դիմավորել են ոստիկանները։ Ոստիկանությունը ակցիայի հետագա առաջխաղացումը կասեցնելու համար արցունքաբեր գազ է կիրառել, իսկ ցուցարարներն ի պատասխան նրանց վրա քարեր են նետել։