Հայաստանի քաղաքացիները կկարողանան բջջային հեռախոսների միջոցով պետական ծառայություններից օգտվել։ Համապատասխան որոշումն ընդունվել է ՀՀ կառավարության մայիսի 25-ի նիստում։
Կառավարության աշխատակազմի ղեկավար, նախարարի պաշտոնակատար Դավիթ Հարությունյայնը նշել է, որ բջջային հեռախոսով նույնականացմամբ ու էլեկտրոնային ստորագրությամբ քաղաքացիները կկարողանան էլեկտրոնային տեսքով ոչ միայն դիմել պետական ծառայությունների համար, այլեւ ստանալ դրանք։
Ներկայում շատ փաստաթղթեր դիմորդին միայն առձեռն են տրվում՝ նրա անձը ստուգելու համար։ Սակայն լիակատար ավտոմատացման օրինակներ արդեն կան, մասնավորապես՝ հարկային հաշվետվությունները, որոնք կարելի է ID քարտի միջոցով ուղարկել։ Այս պրակտիկան ընդլայնելու համար նոր ծրագրային ապահովում է պետք է գնել՝ ID քարտերի նույնականացման սարքեր։ Սակայն պակաս ծախսատար կլինի բջջային կապի հեռախոսահամարներով նույնականացումը։ Դրա համար պարտադիր չէ նույնիսկ սմարթֆոն ունենալ, կարելի է գործածել նաեւ սովորական հեռախոս, եթե դրանում usim քարտ տեղադրվի, ինչպես նաեւ նույնականացման ու էլեկտրոնային ստորագրման համար տրվեն pin ծածկագրերը։