Վերաքննիչ դատարանն անփոփոխ է թողել հիվանդին սխալ ներարկում կատարելու պատճառով միջին ծանրության վնասվածք հասցնելու համար մեղադրվող ակնաբույժ Աննա Գասպարյանի շահերի պաշտպանի բողոքը: Բժշկուհու պաշտպան Վարդուհի Էլբակյանը բողոք էր ներկայացրել Վերաքննիչ՝ պահանջելով Երեւան քաղաքի Աջափնյակ եւ Դավթաշեն վարչական շրջանների ընդհանուր իրավասության առաջին ատյանի դատարանի 2016 թ. փետրվարի 24-ի դատավճիռը բեկանել եւ կայացնել արդարացման ակտ: Վերաքննիչ դատարանը Վարդուհի Էլբակյանի բերած Վերաքննիչ բողոքը ժամկետանց է համարել եւ թողել առանց քննության:

Հիշեցնենք, որ Աննա Գասպարյանը մեղավոր է ճանաչվել Հայաստանի Հանրապետության քրեական օրենսգրքի 130-րդ հոդվածի 1-ին մասով նախատեսված հանցանքում՝ առողջությանն անզգուշությամբ միջին ծանրության վնաս հասցնելը եւ դատապարտվել տուգանքի՝ նվազագույն աշխատավարձի հարյուրhիսնապատիկի` 150.000 /հարյուր հիսուն հազար/ ՀՀ դրամ գումարի չափով:

Աննա Գասպարյանի նկատմամբ ընտրված խափանման միջոցը` չհեռանալու մասին ստորագրությունը, թողնվել է անփոփոխ` մինչեւ դատավճռի օրինական ուժի մեջ մտնելը:

Հիշեցնենք, որ տուժող Աննա Կնյազյանը պնդում է, որ ակնաբույժ Աննա Գասպարյանն իրեն սխալ ներարկում է արել, ինչի հետեւանքով իր աչքը այտուցվել է եւ շլացել։ Կրկնակի փորձաքննությամբ հաստատվել է, որ տուժողի մոտ առողջական խնդիրներն առաջացել են սխալ ներարկման պատճառով։ Ամբաստանյալը, սակայն, պնդում է, որ ինքն ամեն ինչ ճիշտ է արել, իսկ փորձաքննության արդյունքների հետ համաձայն չէ։

Ըստ մեղադրական եզրակացության`Աննա Գասպարյանին մեղադրանք է առաջադրվել Աննա Կնյազյանի առողջությանն անզգուշությամբ միջին ծանրության վնաս հասցնելու համար: Աննա Գասպարյանին մեղադրանք է առաջադրվել ՔՕ 130-րդ հոդվածի 1-ին մասով, որը պատժվում է երեք ամսվա ազատազրկմամբ կամ նվազագույն աշխատավարձի 100–200–ապատիկի չափով տուգանքով։