Մոսկվան Ֆրանսիայի նախագահ Էմանուել Մակրոնի արտահայտությունները ռուսական լրատվամիջոցների՝ Sputnik-ի եւ RT-ի վերաբերյալ, անվանում է հակառուսական քարոզարշավի իներցիա։ Իսկ Ֆրանսիայի առաջնորդի իրավացիությունը հաստատող ոչ մի փաստ չկա։ «ՌԻԱ Նովոստի»-ի փոխանցմամբ՝ այս մասին ասել է ՌԴ ԱԳ նախարար Սերգեյ Լավրովը։
«Ես կարծում եմ, որ այդ գնահատականներում արտացոլվել է հակառուսական քարոզարշավի հայտնի իներցիան, որը ծավալեց Օբամայի վարչակազմն ու որը ներառեց մի շարք երկրներ, այդ թվում՝ Եվրոպայում։ Եւ այդ իներցիայից մեր արեւմտյան գործընկերները ոչ մի կերպ չեն կարողանւմ դուրս գալ»,- մամուլի ասուլիսի ժամանակ ասաց Լավրովը՝ ընդգծելով, որ փաստեր չկան։
ՌԴ նախագահ Վլադիմիր Պուտինի եւ Ֆրանսիայի առաջնորդ Էմանուել Մակրոնի բանակցությունների ավարտին ամփոփիչ մամուլի ասուլիսի ժամանակ Մակրոնը հայտարարել է, որ RT-ն եւ Sputnik-ը իր ընտրական շտաբին հասանելիություն չեն ունեցել, քանի որ «կեղծ տեղեկություն են տարածում»։
