Տիգրանակերտում պեղումները կվերսկսվեն հուլիսի 1-ից։ Այս մասին հունիսի 15-ին լրագրողներին հայտնեց Արցախի հնագիտական արշավախմբի ղեկավար Համլետ Պետրոսյանը։
Նա նշեց, որ պեղումները կվերսկսվեն Արցախի Հանրապետության կառավարության ֆինանսական աջակցության շնորհիվ։ Արշավախմբին 10 մլն դրամ է հատկացվել, իսկ հետո գումարն ավելացել է եւս 7 մլն-ով։
«Դա մեզ հնարավորություն կտա 40-42 օր պեղումներ իրականացնել։ Մենք հույս ունենք հայտնաբերել ամրոցի մուտքը, որը կառուցել է Տիգրանը եւ հույս ունենք, որ դրա վրա արձանագրություններ են պահպանվել», - ասաց հնագետը։
Համլետ Պետրոսյանը հավելեց, որ հանդիպել է մի շարք արտասահմանցի գործընկերների հետ՝ տեխնիկական միջոցների խնդիրը լուծելու նպատակով, որոնց համար արշավախմբի միջոցները չեն բավարարում։ Մասնավորապես, տեխնիկա է անհրաժեշտ քաղաքի մագնիսային սքանավորման համար, որպեսզի հասկանալի լինի, թե ինչ կա դրա տակ։
