Հայկական մշակութային ժառանգության պահպանումն անհնար է միայն պետական միջոցներով, կարծում է հնագետ Համլետ Պետրոսյանը: Հունիսի 15-ին՝ լրագրողների հետ զրույցում նա նշեց, որ այս գործին անպայման պետք է ներգրավել մասնավոր հատվածին:
«Եթե նույնիսկ մեր պետությունը հարուստ լիներ, եւ մեր պաշտոնյաները զերծ մնային կոռուպցիայի ցանկացած ձեւից, մեր միջոցները, միեւնույն է, չէին բավականացնի այս վիթխարի ժառանգության պահպանման համար»,- ասաց նա՝ հավելելով, որ այսօր մեր գլխավոր խնդիրը այդ ժառանգությունը հանրության սեփականությունը, համայնքների սեփականությունը դարձնելն է:
Հնագետի կարծիքով՝ սա հնարավոր է իրականացնել մեծ թվով սոցիալական, մշակութային եւ բիզնես նախագծերի միջոցով: Իսկ պետության միակ դերը պետք է լինի համապատասխան օրենսդրության ապահովումը: Համլետ Պետրոսյանը նշեց, որ նման օրինակ արդեն կա, երբ հուշարձանները հետազոտում, պահպանում եւ շահագործում են մասնավոր ընկերությունները: Այսպես են վարվում Մեծ Բրիտանիայում եւ Իսրայելում:
Համլետ Պետրոսյանը մասնավոր եւ պետական հատվածների հաջող համագործակցություն է համարում նաեւ Տիգրանակերտը: Նա կարծում է, որ այս հուշարձանը կարող է նման մոտեցման առաջամարտիկը լինել:
