Հայաստանի պետական պարտատոմսերը միջոցները կուտակելու ընդունված եւ հուսալի գործիք են: Այս մասին հունիսի 16-ին կայացած մամուլի ասուլիսի ժամանակ ասաց ֆինանսների նախարար Վարդան Արամյանը:
Նրա խոսքով՝ վերջերս դրանց ձեռքբերումն արդեն հնարավոր է դարձել ոչ միայն ֆիզիկապես (Երեւանի առեւտրական մի շարք բանկերի սպասարկման գանձապետական կետերում), այլեւ օնլայն՝ gp.minfin.am հասցեով: Նախարարը որոշեց համակարգը գործնականում ցուցադրել՝ կայք մտնելով եւ 50 հազար դրամի պարտատոմս գնելով: «Իհարկե, կարելի է նաեւ ավելի փոքր գումարի գնել, բայց եթե օրինակ եմ ծառայում, ապա ոչ հազար դրամով»,- ժպտաց Արամյանը:
Նա այնուհետեւ հավելեց, որ պետական պարտատոմսերը կարող են բանկային ավանդներին լավ այլընտրանք դառնալ, քանի որ այն կարելի է ցանկացած պահին բորսայում վաճառել առանց տոկոսային շահույթի կորստի (ի տարբերություն ժամկետային ավանդների, եթե այն ժամկետից վաղ պահանջեք):
«Իսկ եթե հուսալիության մասին խոսենք, ապա միջազգային ոչ մի ֆինանսական կազմակերպության մոտ մեր վճարունակության վերաբերյալ ոչ մի անգամ կասկածներ չեն առաջացել»,- ընդգծեց նախարարը:
Մտնելով gp.minfin.am կայք՝ անհրաժեշտ է գրանցվել id քարտի միջոցով: Դրանից հետո անձնական աշխատասենյակում կարելի է հետեւել պարտատոմսերի կտրոնների եկամտաբերությանը: