Ռուսաստան-Ադրբեջան հարաբերություններում որոշակի բարդություններ են ստեղծվել: Այս մասին, այսօր՝ հունիսի 17-ին, Արցախում, «Հայկական կուսակցությունների երրորդ ֆորում»-ի նիստում «Մեր անվտանգությունը եւ համաշխարհային անվտանգային սպառնալիքները» թեմայով ելույթի ժամանակ նշել է ՀՀ Ազգային անվտանգության ծառայության նախկին ղեկավար Դավիթ Շահնազարյանը, հաղորդում է «Արցախպրեսը»:
Նրա խոսքով՝ Արցախի հիմնահարցը եւ, առաջին հերթին, դրա ռազմական բաղադրիչը շարունակվում են մեզ համար մնալ առաջնահերթ:
«Այսօր մեր երաշխիքը մեր սահմանների պաշտպանությունն է, եւ, իմ գնահատականով նոր լայանածավալ պատերազմի հավանականությունը վերջին երեք ամսում մի փոքր նվազել է, բայց ամեն վայրկյան պետք է պատրաստ լինենք: Այստեղ կարեւորագույն գործոն կա, որ Ռուսաստան-Ադրբեջան հարաբերություններում որոշակի բարդություններ են ստեղծվել՝ կապված գազային շահերի հետ»,- ասել է Դավիթ Շահնազարյանը:
Բանախոսն իր խոսքում անդրադարձել է նաեւ խորհրդարանական դիվանագիտությանը՝ նշելով, որ այն մեծ պոտենցիալ ունի, եւ հույս ունի, որ խորհրդարանական պատվիրակությունները տարբեր հարթակներում կգործեն համաձայնեցված:
Նիստի վերջում ներկաները հանդես են եկել հարցերով եւ ելույթներով, որոնք մեծամասամբ վերաբերում էին Ղարաբաղյան հիմնախնդրին, սահմանային լարվածությանը, ներքին եւ արտաքին այլ մարտահրավերներին: