Կոնգոյի Դեմոկրատական Հանրապետությունում կտրուկ վատացել է մարդու իրավունքներին առնչվող իրավիճակը։ Այս մասին հայտնել է Գերագույն հանձնակատար Զեյդ Ռաադ ալ- Հուսեյնը, ելույթ ունենալով ՄԱԿ-ի մարդու իրավունքների հարցերով Խորհրդում, հայտնում է ՄԱԿ-ի ռադիոն։
Նրա խոսքով, Կոնգոյից ստացվող հաղորդագրությունները սարսափ են առաջացնում՝ տեղի լյուբա ու լուլուա ազգությունների խաղաղ բնակիչները դաժան բռնությունների են ենթարկվում։ ՄԱԿ-ի մարդու իրավունքների հարցերով վարչության աշխատակիցները, որոնք աշխատում են տեղում, հայտնում են կտրված վերջույթներով ու այրվածքներով երեխաների մասին։ Նրանք տեսել են սպանված նորածնի դի ու հղի կանանց՝ պատռված որովայններով։
Փորձագետները հայտնաբերել են 42 զանգվածային գերեզմանափոսեր, իսկ փախստականները պատմում են, որ մարդկանց հաճախ ողջ են թաղում։ Զեյդ Ռաադ ալ Հուսեյնի խոսքով, բոլոր այդ հանցագործությունները մանրակրկիտ հետաքննություն են պահանջում։
Կասաիում բռնկված բռնության ալիքի արդյունքում՝ 2016-ի օգոստոսից սկսած մոտ 1․3 մլն բնակիչ ստիպված է եղել լքել իր տները, ընդ որում 30 հազար մարդ փախել է Անգոլա։
