Երեւանում անցկացվող «Ոսկե ծիրան» կինոփառատոնի մեկ օրն ավանդաբար նվիրվում է գերմանական ֆիլմերին։ Այս մասին Երեւանի «Ոսկե ծիրան» 14-րդ միջազգային կինոփառատոնի բացման կապակցության լրագրողների հետ հանդիպման ժամանակ ասել է Հայաստանում Գերմանիայի արտակարգ եւ լիազոր դեսպան Մաթիաս Քիսլերը։
Նրա խոսքով՝ 2004 թվականից ի վեր, երբ սկսվեց կազմակերպվել փառատոնը, Գերմանիայի դեսպանատունն ու Գյոթեի ինստիտուտը դրա հովանավորների թվում են եղել եւ միշտ աջակցել են «Ոսկե ծիրան»-ին։
«Մենք գիտենք, որ երեւանյան կինոփառատոնն առանձնանում է ճաշակի մակարդակով։ Ուրախ ենք, որ կինոփառատոնում կներկայացվի Ֆաթիհ Ակինի «Անհայտությունից» ֆիլմը։ Գերմանական այդ ֆիմում գլխավոր դերակատարը Դայան Քրյուգերն է, որը Կաննի 70-րդ կինոփառատոնում հաղթեց «Լավագույն դերասանուհի» անվանակարգում»,- նշեց Քիսլերը՝ հավելելով, որ Գերմանիայում ֆիլմն առաջին անգամ ներկայացվել է անցյալ տարվա նոյեմբերին։
Երեւանում «Ոսկե ծիրան» 14-րդ միջազգային կինոփառատոնի շրջանակում ներկայացվել է գերմանական 6 ֆիլմ։ Իսկ Կաննի կինոփառատոնի «Հատուկ հայացք» ծրագրի շրջանակում ներկայացված Վալեսկա Գրիզեբախի «Վեսթերն» ֆիլմը ներառված է «Ոսկե ծիրանի» մրցութային ծրագրում։ Փառատոնը տեղի կունենա հուլիսի 9-16-ը։