Ես չեմ հետեւում «Սասնա ծռեր» խմբի գործով դատավարությանը եւ տեղյակ չեմ, որ չեն կիրառվում կամ ում նկատմամբ չեն կիրառվում: Այս մասին հուլիսի 10-ին` ԱԺ-ում լրագրողների հետ զրույցում ասաց հանրապետական պատգամավոր, նախկին գլխավոր դատախազ Գեւորգ Կոստանյանը:
Ի պատասխան իր` ավելի վաղ արված այն հայտարարության վերաբերյալ հարցին, թե «Սասնա ծռեր» խմբի այն անդամների համար, որոնք Ոստիկանության ՊՊԾ գնդի գրավման իրադարձությունների ժամանակ զենքը վայր կդնեն, պատիժը մեղմ կլինի, Կոստանյանն առարկեց`հայտարարելով, որ նման հայտարարություն չի արել. «Ես ասել եմ, որ եթե հանցագործություն կատարած մարդիկ մեղադրվում են 218 (շենքերի գրավում), 219 (պատանդառում) հոդվածներով, զենքը վայր դնեն եւ շենքերը վերադարձնեն, պատանդներին ազատեն, Քրեական օրենսգրքի համաձայն` պատասխանատվության ենթակա չեն, եթե նրանց արարքները հանցագործության այլ տարրեր չեն պարունակում»: Նախկին գլխավոր դատախազը հավելեց, որ իր ասածը տառացիորեն մեջբերվել է Հայաստանի Քրեական օրենսգրքից: «Հիմա ինչ չի կիրառվում կամ ում նկատմամբ չի կիրառվում, ես տեղյակ չեմ, քանի որ դատավարությանը չեմ հետեւում»,- ամփոփց Գեւորգ Կոստանյանը: