Թերթը զրուցել է «Բարգավաճ Հայաստան» կուսակցության առաջնորդ Գագիկ Ծառուկյանի մամուլի քարտուղար Խաչիկ Գալստյանի հետ:
Պրն Գալստյան, լուրեր են տարածվում, թե Հանրապետականը «հետեւողականորեն շարունակում է թուլացնել «Բարգավաճ Հայաստանի» դիրքերը», ճնշումներ է գործադրում` ջանալով էս գլխից հայտարարություն «կորզել» նախագահական ընտրություններում Սերժ Սարգսյանի թեկնածությունը պաշտպանելու վերաբերյալ:Որպես ասվածը հիմնավորող «իրեղեն ապացույց», վկայակոչվում է, մասնավորապես, ձեր կուսակիցներից երկուսի՝ ֆուտբոլի ֆեդերացիայի ղեկավար կազմից հեռացվելու հանգամանքը: Դուք նման միտում արձանագրե՞լ եք:
Չի կարելի առանձին դեպքերը տեղափոխել քաղաքական հարթություն եւ ներկայացնել որպես ՀՀԿ-ԲՀԿ հակամարտություն: Այդ նույն իրադարձության հետ կապված` ասեմ, որ արտառոց որեւէ բան չի եղել. ֆուտբոլի ֆեդերացիայի գործկոմը հավաքվել է, նոր անդամներ է նշանակել, եւ եթե նրանց կազմում ԲՀԿ ներկայացուցիչներ չկան, մենք դրա մեջ ողբերգական ոչինչ չենք տեսնում: Քաղաքականացնել այդ ամենը, դրանից հեռահար եզրակացություններ անել` ուղղակի անմտություն եմ համարում:
Ինչ վերաբերում է ճնշումներին, «Բարգավաճ Հայաստան» կուսակցության եւ իր առաջնորդի նկատմամբ ճնշումներ լինել չեն կարող. նման փորձերը դատապարտված են ի սկզբանե: Մենք հայտարարել ենք, որ «Բարգավաճ Հայաստան» կուսակցությունը պատրաստվում է խորհրդարանական ընտրություններին, իսկ մնացած հարցերը կարող են քննարկման առարկա դառնալ միայն ընտրություններից հետո: Այնպես որ, պետք չէ իրադարձություններից առաջ ընկնել` զուտ քաղաքական տրամաբանության տեսանկյունից դա անիմաստ է. ժամանակը կգա, եւ ամեն ինչ, ամեն քաղաքական պրոցես իր տրամաբանության մեջ կընթանա:
Քաղաքական որոշ ուժեր անթաքույց ցանկություն ունեն տեսնելու ձեզ կոալիցիայից դուրս, արմատական ընդդիմության շարքերում:
Այս պահին կոալիցիայից դուրս գալու խնդիր չենք քննարկում, այդպիսի մտադրություն չունենք եւ շարունակում ենք կատարել կոալիցիոն հուշագրով մեր ստանձնած պարտավորությունները: Իհարկե տարբեր մարդիկ, քաղաքական ուժեր տարբեր թաքուն կամ անթաքույց ցանկություններ կարող են ունենալ, բայց դա իրենց խնդիրն է` իրենց ցանկությունների ոլորտում էլ թող մնա:
«Բարգավաճ Հայաստան» կուսակցությունը այսօր իշխանության մաս է կազմում եւ իր մասով պատասխանատվություն է կրում վարվող քաղաքականության համար: Նման խոսակցություններն ընդհանրապես անլուրջ եմ համարում: