Մարդու իրավունքների պաշտպանի աշխատակազմի մասնագետները 2017 թվականի հուլիսի 25-ին այցելել են ՀՀ արդարադատության նախարարության «Նուբարաշեն», «Վարդաշեն», «Երեւան-Կենտրոն» եւ «Արմավիր» քրեակատարողական հիմնարկներ:
ՄԻՊ-ից NEWS.am-ին հայտնում են, որ նրանք առանձնազրույցներ են ունեցել Անդրիաս Ղուկասյանի, Գեւորգ Սաֆարյանի, Կարո Եղնուկյանի, Շանթ Հարությունյանի, Հայկ Կյուրեղյանի, մի շարք այլ անձանց, ինչպես նաեւ հացադուլ հայտարարած Վարդան Գերավետյանի եւ Տիգրան Մանուկյանի հետ:
Պաշտպանի աշխատակազմի ներկայացուցիչները ծանոթացել են նրանց առողջական վիճակին, հերթական անգամ ուսումնասիրել անազատության մեջ պահվող նշյալ բոլոր անձանց բժշկական փաստաթղթերը եւ պահման վայրի պայմանները:
Արձանագրված խնդիրների մի մասը քրեակատարողական հիմնարկի վարչակազմի հետ աշխատանքի արդյունքում տեղում լուծում է ստացել, մյուս մասը Արդարադատության նախարարության քրեակատարողական վարչություն կներկայացվի գրավոր ընթացակարգի շրջանակներում:
