2017 թվականի վերջին Հայաստանը կկրկնապատկի Վրաստանի հետ էլեկտրաէներգիայի փոխանցումները: Այս մասին հուլիսի 26-ին՝ լրագրողների հետ հանդիպման ժամանակ ասաց էներգետիկ ենթակառուցվածքների եւ բնական պաշարների փոխնախարար Հայկ Հարությունյանը:
Տարեսկզբից էլեկտրափոխանցումների ծավալը կազմել է 116 մլն կՎտ/ժ կամ Հայաստանի սպառման 3 տոկոսից մի փոքր ավելին: Փետրվարից ապրիլ էներգիա է փոխանցել Հայաստանը, մայիսից հուլիս՝ Վրաստանը: «Տարեվերջին մենք ցանկանում ենք նշածս ցուցանիշը կրկնապատկել»,- նշեց Հարությունյանը:
Էներգետիկ փոխանակումն ընդլայնվել է նոր համագործակցության շրջանակում եւ այն պատճառով, որ երկու երկրներն ավելի շատ էլեկտրականության կարիք են ունեցել ցուրտ ձմռան եւ շոգ ամռան պատճառով: Փոխնախարարի խոսքով՝ առաջիկա տարիներին Հայաստանի եւ Վրաստանի էներգահամակարգերը կանցնեն զուգահեռ ռեժիմի եւ կկարողանան մեկը մյուսին էլերկտրականությունն ավելի հեշտ փոխանցել: Այս նպատակով սահմանին գերմանական KfW բանկի «Կովկասի էլեկտրահաղորդման ցանց» վարկի շրջանակում կկառուցվի բարձրավոլտ ենթակայան (500/400/220 կՎ): Նույն ծրագրով 400 կՎ էլէկտրահաղորդման գիծ կկառուցվի Հայաստանից Վրաստան: Արդյունքում 2 էներգահամակարգերի միջեւ թողունակությունը մոտ 3 անգամ կմեծանա: Առայժմ Հայաստանի եւ Վրաստանի էլեկտրափոխանցման համակարգերը գործում են մեկուսացված ռեժիմում, եւ փոխանակման համար կողմերն իրենց համակարգերում մշտական հոսանքի ժամանակավոր կղզյակներ են ստեղծում:
