«Զինված խմբի» գործով ամբաստանյալ Վահան Շիրխանյանի հեռախոսազանգերի եւ տեսակցությունների վրա դրված արգելքը վերացվել է։ Այս մասին այսօր՝ հուլիսի 28–ին, լրագրողների հետ զրույցում հայտնել է նրա պաշտպան Հայկ Ալումյանը։
Պաշտպանի խոսքով՝ Վահան Շիրխանյանի հարազատները կարող են նրան տեսակցել երկուշաբթի օրվանից։
Նշենք, որ այս գործի նյութերով, Արթուր Վարդանյանը 2015թ. ապրիլից ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանում իշխանությունը յուրացնել:
Ըստ մեղադրանքի, պաշտպանության նախկին փոխնախարար Վահան Շիրխանյանը եւ եւս 16 անձինք միացել են Արթուր Վարդանյանին:
Նրանց բոլորին մեղադրանք է առաջադրվել Քրեական օրենսգրքի 223-րդ հոդվածի (Հանցավոր համագործակցություն ստեղծելը կամ հանցավոր համագործակցությանը մասնակցելը), 235-րդ հոդվածի 3-րդ (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, կատարվել են կազմակերպված խմբի կողմից) եւ 35-300-րդ հոդվածի 1-ին մասով (Իշխանությունը յուրացնելու նախապատրաստություն): Նշենք, որ դատարան է ուղարկվել այն անձանց գործը, որոնց մեղադրանքը հետագայում խստացվել էր:
