«Նաիրիտ» գործարանի նախկին աշխատակիցներն այսօր՝ օգոստոսի 10-ին, կրկին հավաքվել էին Կառավարության դիմաց՝ պահանջելու գործարանի վերագործարկում:
Նաիրիտցիներն այսօր որեւէ կոչ չհնչեցրին: NEWS.am-ի հետ զրույցում նաիրիտցիների ցույցերը համակարգող Կարինե Շահվերդյանը նշեց, որ հավաքվել են այստեղ՝ եւս մեկ անգամ իշխանություններին բարձրաձայնելու իրենց խնդրի մասին:
«Եվրոպացի ներդրողներն են եկել, որոնք հանդիպում են ունեցել Կառավարության անդամների հետ, որոշվել է աուդիտ անցկացնել՝ հասկանալու համար, թե որքան ներդրում է հարկավոր գործարանի վերագործարկման համար: Մեզ ասացին, որ եթե մեկ տարի առաջ սկսեցին այս գործընթացը, ապա աուդիտ անցկացնելու անհրաժեշտություն չէր լինի, իսկ ներդրումների չափն էլ մեծ չէր լինի: Մեր տեղեկություններով, աուդիտի անցկացման վերաբերյալ որոշումն այսօր ստորագրվելու է»,- ասաց Կարինե Շահվերդյանը:
Գործարանի նախկին աշխատակցի խոսքով, վերագործարկման դեպքում բոլորը կվերականգնվեն, նույնիսկ 70-ն անց աշխատակիցները, քանի որ նրանց կարիքն իսկապես կա:
Մոտ մեկ ժամ Կառավարության դիմաց սպասելուց հետո մի քանի տասնյակ նաիրիտցիները հեռացան:
Նշենք, որ «Նաիրիտ» գործարանը սնանկ է ճանաչվել, նախկին աշխատակիցները պահանջում են վերագործարկել այն: