Ի տարբերություն Հայաստանի՝ Եվրոպայում դեռ նախապատրաստական փուլում զբաղվում են կասկածելի որակի ապրանքի՝ վաճառակետերում հայտնվելը կանխելով։ Այս մասին օգոստոսի 11–ին լրագրողների հետ հանդիպման ժամանակ հայտարարել է Հայաստանի սպառողների միության նախագահ Արմեն Պողոսյանը՝ պատասխանելով NEWS.am–ի թղթակցի հարցին՝ արդյո՞ք կարելի է վստահել հայկական արտադրանքին, եթե հաշվի առնենք փաստը, որ վերջերս նույնիսկ Բելգիայում, որտեղ սանիտարահիգիենիկ վերահսկողության նորմերը ավելի խիստ են, հայտնվել են տեղական արտադրության նեխած ձվեր։
Պողոսյանի խոսքով՝ եթե ապրանքը Եվրոպայի համապատասխան մարմինների շրջանակում կասկածներ է առաջացնում եւ եթե կասկածներ կան, որ այն կարող է վտանգավոր լինել մարդու առողջության համար, ապա այն ուղղակի թույլ չեն տալիս վաճառակետեր տանել։
«Ձվերի արտադրության եւ հավերի բուծման հարցում մեզ մոտ եւս որոշակի տեղաշարժ է նկատվում»,–նշեց ՀԿ–ի ղեկավարը՝ հավելելով, որ սննդամթերքի անվտանգության պետական ծառայությունը պետք է խախտումների դեմ պայքարի արդյունավետ միջոցներ ձեռնարկի։
Ընդհանուր առմամբ Արմեն Պողոսյանը կարծում է, որ Հայաստանին անհրաժշետ է որակի վերահսկողության համակարգ, որը կգործի ամենուր։
«Որակի վերահսկողության համակարգը միջազգային չափանիշ է։ Թող որեւէ մեկը ցույց տա, որ նա այս չափանիշն ունի»,–նկատեղ Պողոսյանը՝ նշելով, որ Հայաստանում որակի վերահսկողության հետ կապված իրավիճակը ողբալի է։